Atvinnutekjur ellilífeyrisþega skerði ekki ellilífeyri

Flokkur fólksins hefur lagt fram sitt fyrsta frumvarp til laga á Alþingi. Er það til breytingar á lögum um almannatryggingar þannig að atvinnutekjur ellilífeyrisþega skerði ekki ellilífeyri. Verður mælt fyrir frumvarpinu á þingfundi á morgun.

Verði frumvarpið að lögum öðlast þau gildi 1. janúar 2018 og koma til framkvæmda 1. febrúar 2018. 

Í greinargerð sem fylgir frumvarpinu segir að með lögum um breytingar á lögum um almannatryggingar frá árinu 2016 hafi meðal annars verði gerð sú breyting á ellilífeyriskerfi almannatrygginga að öll sértæk frítekjumörk vegna einstakra tegunda tekna voru afnumin. Var þess í stað lögfest eitt almennt frítekjumark sem nemur 25 þúsund krónum á mánuði og gildir það um allar tekjur ellilífeyrisþega, óháð tegund þeirra.

Í greinargerðinni segir að gagnrýni hafi komið fram á þessa breytingu að því er atvinnutekjur varðar og hafa komið fram kröfur af hálfu hagsmunasamtaka aldraðra og fleiri aðila um að afnema skerðingar á atvinnutekjur eldri borgara.

Flokkur fólksins segir að óumdeilt sé að áframhaldandi vinna eftir að ellilífeyrisaldri er náð auki möguleika aldraðra til að bæta kjör sín, einkum þeirra sem lægstar hafa tekjurnar. Þá hafi rannsóknir sýnt fram á að vinna og virkni á efri árum stuðlar að betri heilsu, dregur úr einangrun og hefur almennt mikið félagslegt gildi fyrir eldri borgara. Því er lagt til að greiðslur til ellilífeyrisþega verði ekki skertar vegna atvinnutekna.