Ótrúlegur endir þegar Patriots vann toppslaginn

New England Patriots tryggði sér í gærkvöldi sigur í austurriðli Ameríkudeildarinnar og þar með sæti í úrslitakeppninni með ótrúlegum sigri á Pittsburgh Steelers í uppgjöri tveggja bestu liða deildarinnar.

Steelers hefði með sigri nánast tryggt sér efsta sæti Ameríkudeildarinnar og þar með heimavallarrétti í úrslitakeppninni, sem skiptir gríðarlegu máli þar sem miklar líkur eru á því að þessi tvö lið mætist í úrslitaleik Ameríkudeildarinnar í lok janúar. Sigurvegari þess leiks kemst áfram í Super Bowl.

Heimamenn í Steelers voru í góðri stöðu í síðari hálfleik. Liðið var með forystu, 24-16, en eins og svo oft áður náði Tom Brady, leikstjórnandi Patriots, að klóra sig úr slíkum vanda. Patriots komust yfir, 27-24, með snertimarki Dion Lewis þegar 56 sekúndur voru eftir af leiknum. Brady hafði þá komið sínu liði þvert yfir völlinn með því að kasta ítrekað á innherjann Rob Gronkowski, sem sneri aftur eftir eins leiks bann.

En þrátt fyrir að lítið hafi verið eftir af leiknum náði Steelers að skora snertimark þegar 28 sekúndur voru eftir. Innherjinn Jesse James virtist hafa skorað en snertimarkið reyndist ógilt eftir langa íhugun dómarateymisins.

Pittsburgh hélt þó boltanum og fékk fleiri tækifæri til að skora. En Duron Harmon, varnarmaður Patriots, greip inn í sendingu Ben Roethlisberger og tryggði sínu liði sigurinn þegar fimm sekúndur voru eftir af leiknum.

Til að bæta gráu á svart meiddist útherinn Antonio Brown hjá Steelers en hann er einn allra besti leikmaður deildarinnar. Steelers er öruggt með sæti í úrslitakeppninni og eru vonir bundnar við að Brown snúi aftur til leiks þegar hún hefst.

Jacksonville vann sinn tíunda sigur á tímabilinu er liðið fór illa með Houston, 45-7. Með sigrinum er Jacksonville öruggt með sæti í úrslitakeppninni.

Tvö lið eru örugg með sæti í úrslitakeppninni í Þjóðardeildinni - Philadelphia Eagles og Minnesota Vikings. Philadelphia vann nauman sigur á New York Giants, 34-29, þar sem Nick Foles leysti Carson Wentz, leikstjórnanda arnanna, af hólmi og stóð sig með mikilli prýði.

Minnesota vann öruggan sigur á Cleveland Browns, 34-7, sem er enn án sigurs í NFL-deildinni þetta tímabilið.

Þá vann Carolina Panthers sigur á Green Bay Packers, 31-24, í endurkomuleik Aaron Rodgers, leikstjórnanda Packers en hann viðbeinsbrotnaði fyrir tveimur mánuðum.

LA Rams vann uppgjör tveggja efstu liða vesturriðils Þjóðardeildarinnar er liðið gjörsigraði Seattle Seahawks, 42-7.

Tvær vikur eru eftir af deildarkeppninni í NFL-deildinni en úrslitakeppnin hefst í byrjun janúar.

Hér má sjá stöðuna í deildinni.

Úrslit helgarinnar:

Detroit - Chicago 20-10

Kansas City - LA Chargers 30-13

Cleveland - Baltimore 10-27

Washington - Arizona 20-15

NY Giants - Philadelphia 29-34

Buffalo - Miami 24-16

Carolina - Green Bay 31-24

Jacksonville - Houston 45-7

Minnesota - Cincinnati 34-7

New Orleans - NY Jets 31-19

Seattle - LA Rams 7-42

Pittsburgh - New England 24-27

San Francisco - Tennessee 25-23

Oakland - Dallas 17-20