Einn besti markvörður heims hættir í sumar og byrjar að aðstoða Patrek

Sænski markvörðurinn Mattias Andersson hefur samið við austurríska handboltasambandið um að gerast markvarðaþjálfari karlalandsliðsins næsta sumar. Hann mun einnig koma að þjálfun yngri landsliða Austurríkis.

Andersson leggur skóna á hilluna eftir tímabilið og fer þá beint í að aðstoða Patrek Jóhannesson, landsliðsþjálfara Austurríkis.

Austurrísku markverðirnir ættu að njóta góðs af þessari ráðningu en Andersson hefur lengi verið í hópi bestu markvarða heims.

Andersson hefur leikið með Flensburg frá árinu 2011. Áður lék hann með Ystads, Drott, Barcelona, Kiel og Grosswallstadt. Andersson hefur fjórum sinnum orðið Þýskalandsmeistari á ferlinum og tvisvar sinnum unnið Meistaradeild Evrópu.

Austurríki verður með á EM í Króatíu í janúar þar sem liðið er með Frakklandi, Hvíta-Rússlandi og Noregi í riðli. Austurríki heldur EM 2020 með Noregi og Svíþjóð.