Jóna Sólveig lætur af embætti varaformanns Viðreisnar

Jóna Sólveig Elínardóttir hefur ákveðið að láta af embætti varaformanns Viðreisnar. Hún greinir frá þessu í færslu á Facebook síðu sinni.

„Um miðjan desember tilkynnti ég stjórn Viðreisnar um þá ákvörðun mína að ég léti af embætti varaformanns. Ákvörðunin er tekin að vel ígrunduðu máli en eins og sakir standa, og í ljósi þess að nú er nýr áfangi í lífi mínu að hefjast, tel ég mig ekki geta gefið mig af fullum krafti í embættið,“ skrifar Jóna.

Þá segist hún ekki vera hætt afskiptum af stjórnmálum en að hún telji rétt að beina athyglinni tímabundið að öðrum verkefnum.

Í samtali við Vísi segir hún að þetta hafi ekki verið auðveld ákvörðun. „Auðvitað er þetta ekki auðveld ákvörðun að taka þegar maður er búinn að gefa sig af lífi og sál í þetta í svona langan tíma. Þetta er þó ákvörðun sem mér líður vel með að hafa tekið,“ segir hún.

Jóna segist ekki geta greint frá því að svo stöddu hvaða verkefni hún tekur nú að sér.