Ásgeir Örn: Fantasy var farið að eyðileggja fyrir mér að horfa á NFL

Margir leikmanna íslenska liðsins eru miklir NFL-aðdáendur og þeir munu líklega vaka aðeins lengur en venjulega í kvöld enda frábærir leikir í boði í úrslitakeppninni í kvöld.

„Við tökum allavega fyrri leikinn. Ég er Patriots-maður og veit ekki hvort ég vaki í nótt,“ sagði Ásgeir Örn sposkur en hann er alveg líklegur til þess að kíkja aðeins á sína menn í nótt.

NFL-áhugamennirnir í hópnum hafa undanfarin ár spilað NFL Fantasy en Ásgeir ákvað að hætta því núna.

„Þetta var farið að eyðileggja fyrir mér að horfa á NFL. Ég slaufaði fantasy og hafði gaman af NFL í staðinn. Fór að horfa meira bara á Patriots-leikina í stað þess að horfa á redzone.“

Ásgeir spáði aðeins í úrslit helgarinnar en mundi ekki eftir einum leik og það gerði blaðamaður, sem á að heita NFL-sérfræðingur, ekki heldur. Það var samt að sjálfsögðu leikur Pittsburgh og Jacksonville.

Allir leikirnir um helgina verða að sjálfsögðu í beinni útsendingu á Stöð 2 Sport.