Vigdísarstofnun fær eitt stærsta orðabókasafn í heimi til varðveislu

Alþjóðadagur móðurmálsins er í dag. Í Veröld – húsi Vigdísar verður málþing um mikilvægi orðabóka um leið og tekið er á móti einu stærsta orðabókasafni heims.

„Málþingið okkar sem stendur frá 14.30 til 17.30 í dag snýst um mikilvægi orðabóka til að byggja brýr milli menningarheima. Þar verður fjallað um fjölbreytt efni úr fortíð og nútíð,“ segir Þórunn Elísabet Bogadóttir, kynningarstjóri hjá Veröld – húsi Vigdísar. Hún segir einkunnarorð alþjóðadags móðurmálsins snúast um að viðhalda fjölbreytni tungumála og ýta undir fjöltyngi, það séu líka meginmarkmið Vigdísarstofnunar svo að allt passi þetta saman.

Þetta er líka stór dagur í öðru tilliti fyrir stofnunina eins og Þórunn Elísabet lýsir.

„Veröld er að taka á móti stóru safni alls konar orðabóka, líklega einu stærsta orðabókasafni í heimi sem Vigdísarstofnun er að fá til varðveislu frá Þýskalandi. Það eru samtökin InfoTern sem afhenda það. Þetta er fyrsta flokks safn og margar orðabókanna eru tví- og margmála, þannig að bæði er um að ræða stærstu tungumál heims en líka mörg minna þekkt tungumál frá öllum heimshornum.“

Þórunn segir safnið verða til sýnis að loknu málþinginu og bætir við að boðið verði upp á veitingar.

Þá bendir Þórunn Elísabet líka á að dagurinn sé upphafið að mánuði fjöltyngis og  fleiri viðburðir verði í framhaldinu, bæði á vegum Veraldar – húss Vigdísar, Borgarbókasafnsins og Móður­máls, samtaka um tvítyngi.

Þess má geta í framhaldinu að alþjóðadegi móðurmálsins verður sérstaklega fagnað í Menningarhúsinu Gerðubergi næsta laugardag. Þá verður þar Café Lingua fyrir alla fjölskylduna undir yfirskriftinni Tungumálatöffarar og töfrandi tónar á Borgarbókasafninu.

Þar verður hægt að taka þátt í tungumálasmiðju og karókíi þar sem tungumálin fá að njóta sín.