Þjónustuaðili biður Menntamálastofnun afsökunar vegna samræmdu prófanna

Menntamálastofnun harmar mjög að próftaka á samræmdu prófi í ensku, sem lagt var fyrir nemendur 9. bekkja í dag, hafi ekki gengið sem skyldi. Tæknilegir örðugleikar komu upp við fyrirlögn prófsins í dag, eins og á miðvikudag við fyrirlögn samræmds prófs í íslensku, en vefþjónn virðist ekki geta staðið undir álagi þrátt fyrir umfangsmiklar athuganir.

Þá hefur Assessment Systems, þjónustuaðili sem hafði umsjón með vefþjóni við próftökuna, beðið Menntamálastodnun afsökunar vegna örðugleikanna. Þetta kemur fram í tilkynningu frá Menntamálastofnun.

„Álagið var mikið og virðist vefþjónninn því miður ekki hafa staðið undir því. Þrátt fyrir umfangsmiklar athuganir og álagsprófanir hjá þjónustuaðila á prófakerfinu kemur samt í ljós að kerfið stenst ekki þetta álag,“ segir í tilkynningu Menntamálastofnunar.

Fundað með hagsmunaaðilum eftir helgi

Ákveðið hefur verið að fresta próftöku á enskuprófinu en í tilkynningu segir að með velferð nemenda að leiðarljósi sé ekki boðlegt að þeir taki próf við þessar aðstæður. Eftir helgi verður fundað með hagsmunaaðilum þar sem ákvörðun verður tekin um fyrirlögn prófanna.

Þá þykir ljóst að próftökuaðstæður fyrir marga nemendur hafi ekki verið fullnægjandi og tekið verður mið að því við ákvörðun um framhaldið.

„Menntamálastofnun harmar þetta mjög og þau áhrif sem þetta hefur haft á nemendur, foreldra og skólasamfélagið í heild. Þar sem mikill undirbúningur liggur að baki hjá öllum eru þetta gífurleg vonbrigði. Í ljósi þess óskum við eftir því við þá sem standa næst nemendum að upplýsa þá um stöðu mála og hlúa að þeim eftir bestu getu,“ segir í tilkynningu.

Auðkennisstaðfesting virðist meinið

Áfram verður unnið að frekari úrlausn vandans og upplýst reglulega um stöðu mála. Þjónustuaðilinn Assessment Systems hefur enn fremur greint vandann, sem virðist vera rakinn til nýrrar auðkennisstaðfestingar í kerfinu. Þá biður Assessment Systems Menntamálastofnun og nemendur afsökunar á þeim óþægindum sem truflun á próftöku hefur valdið.

Hér að neðan má sjá tilkynningu frá Assesment Systems í heild sinni:

Assessment Systems is extremely sorry for this unfortunate interruption in testing. We apologize to the Directorate of Education and the Icelandic students for the breach in confidence and surrounding issues this has caused. During scheduled testing on March 9th 2018 our EU database encountered an unexpected error.

We had technicians live and on call during the testing process, but unfortunately we were unable to correct the problem fast enough to allow many students to continue the test. We have discovered the source of the problems was with an identity verification screen that was new for this year. We are working very closely with the Directorate of Education to correct these problems. We apologize to all the students and teachers who were impacted by this interruption in the exams. We are putting in additional steps in our processes to prevent any future occurrence.