„Langbest að sleppa öllu skítkasti hér“

Til harðra orðaskipta kom á Alþingi í dag milli Loga Einarssonar, formanns Samfylkingarinnar, og Bjarna Benediktssonar fjármála- og efnahagsráðherra í óundirbúnum fyrirspurnatíma.

Beindi þar Logi fyrirspurn sinni til Bjarna um vopnaflutninga Air Atlanta til Sádi-arabíu. Sagði hann þögn ráðherrans æpandi í hinum ýmsu málum og nefndi þar mál ungs hælisleitenda sem varð fyrir líkamsárás á Litla-Hrauni og var sendur úr landi.

„En þögn hæstvirts fjármálaráðherra um vopnamálið er líka æpandi. Hann sér sér enga ástæðu til að bregðast við þótt komið hafi í ljós að ríkisstjórnir sem hann hefur haft aðild að og stjórnað að miklu leyti hafi gefið heimildir til að senda vopn til Sádi-arabíu, sem líkur eru á að séu áframsend til að slátra saklausu fólki, börnum og konum, í Jemen og Sýrlandi,“ sagði Logi.

Sagði Bjarna þekktan fyrir að stinga skýrslum undir stól

Hann hélt áfram og spurði hvers vegna ekki hefði verið haft samráð við utanríkismálanefnd um málið, hvers vegna málið hafi ekki verið skoðað betur og upplýst í gegnum tíðina í ljósi rannsóknarskyldu stjórnvalda.

„Þar sem hæstvirtur fjármálaráðherra er nú orðinn býsna þekktur af því að fela gögn og stinga skýrslum undir stól, af hverju ætti þjóðin virkilega að trúa því að hæstvirtur fjármálaráðherra og fyrrum forsætisráðherra hafi ekki vitað neitt um málið. Ég spyr, herra forseti, er þetta enn eitt dæmið um leyndarhyggju Sjálfstæðisflokksins?“

Lokaorð Loga fóru ekki vel í fjármálaráðherra.

„Ég held að málið sem er hér tekið upp verðskuldi það nú að menn sleppi öllu svona ómerkilegu skítkasti eins og háttvirtur þingmaður fer út í hér að saka menn um leyndarhyggju og að sópa undir teppið einhverjum málum og blanda saman algjörlega óskyldum atriðum hér. Held ég að sé umræðu um þetta mál ekki til framdráttar,“ sagði Bjarni.

Best að sleppa skítkasti í ræðustól

Sagði hann jafnframt sjálfsagt og eðlilegt að þingið spyrji spurninga, leiti skýringa á því þegar hlutir fari úrskeiðis og hvað hafi leitt til þess að vopn hafi mögulega verið flutt til átakasvæða á vegum íslenskra aðila. Sagði hann heiminn vera flókinn og að það væri ekki einfalt fyrir íslenska stjórnsýslu að komast til botns í sérhverju tilviki.

„En þegar um vopn er að ræða þá ættu menn svo sannarlega að fara varlega og gá að sér og leita skýringa og upplýsinga og mér finnst að nýjasta dæmið sem við höfum úr íslenska stjórnkerfinu sýni að það sé einmitt það sem menn vilja gera,“ sagði Bjarni.

„En ef við viljum reyna að skilja þetta mál til hlítar og spyrja réttara spurninga um það hvort það séu atriði í íslenskri stjórnsýslu, í stjórnkerfinu, sem þarfnist endurskoðunar í tilefni að þessu máli sem nú er komið upp þá er langbest að sleppa öllu skítkasti hér út af óskyldum málum í ræðustól.“

Taldi ekki trúverðugt að Bjarni hafi ekkert vitað

Logi tók þá aftur til máls og sagði að ráðherrann gæti kallað það sem hann vilji skítkast.

„En þegar mál eru falin í eitt skipti getum við kallað þau slys. Í annað skiptið geta þau hugsanlega verið slæleg vinnubrögð en þegar það gerist í fjórða og fimmta skiptið þá heita það vinnureglur. Sjálfstæðisflokkurinn hefur sannarlega sýnt hverjar eru hans vinnureglur þegar kemur að gögnum sem honum finnst ekki eigi að koma fyrir alþjóð og geti komið flokknum illa,“ sagði Logi.

„Mér finnst hins vegar rétt að spyrja hæstvirtan ráðherra hvenær vissi hann um þessa flutninga og þar sem þetta eru umfangsmiklir flutningar, er það trúverðugt að enginn ráðherra hafi vitað neitt í öll þessi ár? Ef hann vissi það ekki, herra forseti, þá átti hann að minnsta kosti að vita það.“

„Hvert er háttvirtur þingmaður eiginlega kominn?“

Í öðru svari sínu sagðist Bjarni ekki átta sig á því hvað Logi ætti við þegar hann sagði að hann hefði, sem fjármálaráðherra eða forsætisráðherra, átt að vita hvaða farmur væri í flugvélum íslenskra aðila á milli landa.

„Hvert er háttvirtur þingmaður eiginlega kominn? Heldur hann virkilega að hæstvirtur fjármálaráðherra sé að fara yfir farmskrárnar? Þetta er algerlega rakalaus áburður sem er hér færður fram og augljóst að það hefur aldrei verið á mínu borði að fara yfir þau stjórnsýslulegu atriði sem þarf að gá að í þessum málum. Þetta hélt ég nú að hefði komið ágætlega fram í athugun utanríkismálanefndar og ég ítreka bara það sem ég segi,“ sagði Bjarni.

„Reynum nú að halda aftur af okkur með skítkast milli flokka sem mér finnst háttvirtu þingmaður fara beint í og leggjum þeim mun meiri áherslu á að skilja eðli þessa máls og spyrja réttu spurninganna um stjórnsýslulegar ákvarðanir.“