Framlag ríkisins til Samtakanna ´78 tvöfaldað

Ráðgjafar- og fræðsluhlutverk Samtakanna ´78 verður eflt í samræmi við áherslur stjórnvalda um að koma Íslandi í fremstu röð í málefnum hinsegin fólks. Ásmundur Einar Daðason félags- og jafnréttismálaráðherra og Daníel E. Arnarsson, framkvæmdasstjóri samtakanna hafa undirritað þjónustusamning þessa efnis.

Á vef stjórnarráðsins segir að í samningunum sé fjallað um þó fræðslu og þjónustu sem Samtökin ´78 munu annast fyrir fjárframlag velferðarráðuneytisins. Samkvæmt þjónustusamningnum fá Samtökin ´78 greiddar 12 milljónir króna á þessu ári til að sinna þeim verkefnum sem tilgreind eru. Enn fremur hefur verið ákveðið að velferðarráðuneytið og samtökin vinni sameiginlega að því að endurskoða framlög til samtakanna með það að markmiði að opinber stuðningur verði sambærilegur því sem tíðkast gagnvart systursamtökum þeirra annars staðar á Norðurlöndunum.

Markmiðið sé meðal annars að skapa hinseginvænt samfélag og auka sýnileika hinsegin fólks, eins og það er orðað á vef stjórnarráðsins. Til þess að ná því markmiði munu samtökin meðal annars veita sérstaka ráðgjöf og fræðslu um málefni hinsegin fólks, jafnt fyrir hlutaðeigandi einstaklinga, aðstandendur þeirra og fyrir fagfólk sem nýst getur slík fræðsla í störfum sínum, líkt og nánar er skilgreint í samningnum.

„Hlutverk Samtakanna ´78 hefur breyst á liðnum árum og verkefnin beinst í vaxandi mæli að því að sinna einstaklingsmálum, fræðslu og ráðgjöf. Sérstaklega er fjallað um þetta í samningnum þar sem kveðið er á um að hinsegin fólki og aðstandendum þess skuli standa til boða, því að kostnaðarlausu, ráðgjöf vegna persónulegra mála, félags- og sálfræðiráðgjöf og lögfræðiráðgjöf. Þjónustan skal veitt á landsvísu eftir því sem við verður komið og ef einstaklingar hafa þörf fyrir túlk skulu samtökin hafa milligöngu um það samkvæmt samningnum,“ segir á vef stjórnarráðsins.

Nánari upplýsingar, sem og ummæli ráðherrans og fulltrúa Samtakanna '78, má nálgast með þvi að smella hér.