Eiður spilar með Ballack og fleirum í góðgerðarleik Chelsea

Eiður Smári Guðjohnsen mun dusta rykið af takkaskónum í maí þegar hann tekur þátt í góðgerðarleik Chelsea gegn Inter þar sem bæði lið verða skipuð fyrrum leikmönnum og stjórum félaganna.

Félagið greinir frá því á heimasíðu sinni að fleiri goðsagnir bætist í lið Chelsea í leiknum því Eiður Smári og Þjóðverjinn Michael Ballack hafi bæst í hópinn. Leikurinn verður leikinn í minningu Ray Wilkins, fyrrum leikmanns og þjálfara Chelsea, sem lést nú í apríl.

„Ég get ekki beðið eftir að snúa aftur á Stamford Bridge og spila fyrir framan áhorfendur Chelsea með fyrrum vinum og liðsfélögum og stórum nöfnum úr sögu félagsins,“ er haft eftir Eiði Smára á heimasíðu Chelsea.

„Ray hafði mikil áhrif á mig, bæði persónulega og ferilinn, og ég veit hversu mikilvægur hann var öllum innan félagsins sem og fótboltaheiminum.“

Eiður og Ballack bætast í hóp manna á borð við Gianfranco Zola, Roberto di Matteo og Dennis Wise sem munu allir reima á sig skónna að nýju í maí.