Lennon gagnrýnir Helga Mikael: „Andar á leikmenn og færð gult spjald“

Helgi Mikael Jónasson hafði mikið að gera í gærkvöld þegar hann dæmdi leik Stjörnunnar og Víkings í 3. umferð Pepsi deildar karla þar sem fjórar vítaspyrnur voru dæmdar.

Skotinn Steven Lennon, framherji FH, vandaði Helga ekki kveðjurnar á Twitter eftir leikinn í gær. „Ekki snerta leikmenn þegar Helgi er nálægt. Aukaspyrna og gult spjald ef þú andar á þá,“ stóð í tísti Lennon.

Don’t touch players when Helgi is about.. breathe on them and it’s a foul and a yellow.

— StevenLennon (@StevenLennon_10) May 14, 2018

Helgi Mikael var maðurinn með flautuna í fyrsta leik FH á tímabilinu gegn Grindavík suður með sjó þar sem 10 gul spjöld fóru á loft. Sex þeirra fóru á FH-inga, Lennon slapp þó við spjald.

Vítaspyrnudómarnir í Garðabænum í gærkvöld voru sumir umdeildir á samfélagsmiðlum og þjálfararnir ósammála með gildi þeirra í viðtölum eftir leik. Sérfræðingar Pepsimarkanna fóru yfir þetta allt í gærkvöld og samþykktu þrjá af fjórum dómum.