Guardian bendir lesendum á að fylgjast með Haraldi

Haraldur Franklín Magnús er einn fimm kylfinga sem hafa skal sérstakt auga með á Opna breska meistaramótinu að mati breska blaðsins Guardian.

Haraldur er fyrsti íslenski karlkylfingurinn sem tekur þátt á einu risamótanna fjögurra í golfi. Hann er fimmta nafnið í samantekt Guardian yfir fimm kylfinga sem ekki eru fastagestir á risamótum sem vert er að fylgjast með.

„Hinn 27 ára Haraldur er fyrsti Íslendingurinn til þess að spila á risamóti. Hann er í 1089. sæti heimslistans og var einu sinni þjálfaður af bróður Gylfa Sigurðssonar. Leikarinn Kristján, faðir hans, er vel þekktur sjónvarpsskúrkur heima fyrir. Haraldur, sem byrjaði að spila golf 15 ára, lýsti sjálfum sér sem einfara sem þætti athygli óþægileg, eitthvað sem gæti verið vandamál næstu fjóra daga,“ sagði í umfjöllun Guardian.

Hinir fjórir á listanum eru Englendingarnir Marcus Armitage og Ashton Turner, Jovan Rebula frá Suður-Afríku og Nýsjálendingurinn Ryan Fox.

Haraldur mun hefja leik á Opna breska klukkan 9:53 að íslenskum tíma á morgun. Vísir mun fylgjast vel með gangi mála hjá Haraldi og er bein útsending frá mótinu á Golfstöðinni frá klukkan 5:30 í fyrramálið.