Þórhildur Sunna um ávarp Piu Kjærsgaard: „Ég var bara andvaka yfir þessu í nótt“

„Ég var bara andvaka yfir þessu í nótt, satt best að segja,“ segir Þórhildur Sunna Ævarsdóttir, þingflokksformaður Pírata, sem hefur glímt við að taka ákvörðun vegna þeirrar stöðu sem kom upp eftir að þingflokkur Pírata komst að því í gær að til stæði að umdeildur stjórnmálamaður, Pia Kjærsgaard, myndi flytja ræðu á hátíðarfundi á Þingvöllum í dag í tilefni af hundrað ára fullveldisafmæli Íslendinga.

Sjá nánar: Píratar sniðganga hátíðarfund Alþingis

Í fyrstu ákvað Þórhildur að breyta ræðu sinni til þess að mótmæla Piu og hennar viðhorfum. Í ræðunni sem Þórhildur átti að flytja í dag gerði hún öfgaþjóðernishyggju að umfjöllunarefni sínu. Eftir nokkra umhugsun segir Þórhildur að ræðan ein og sér hefði ekki verið nóg til þess að koma sínum sjónarmiðum til skila og ákváðu þingmenn Pírata því að endingu að sniðganga hátíðarsamkomuna.

„Ég gat ekki, samvisku minnar vegna, haldið einhverja ræðu, því sama hvað ég myndi gagnrýna Piu mikið og það sem hún stendur fyrir, væri ég samt á sama tíma að normalísera það að hún skuli vera heiðursgestur á hátíðarsamkomu fullveldisafmæli Íslendinga,“ segir Þórhildur í samtali við fréttastofu.

Hefur áhyggjur af lýðræðisþróuninni

Þórhildur segir að á sama tíma og við fögnum fullveldisafmælinu sé full ástæða til þess að hafa áhyggjur af þjóðernishyggju. „Það er svo þunn lína á þessum tímum þar sem popúlískar hreyfingar, fasismi, rasismi og útlendingaandúð er að tröllríða svo mörgum löndum í kringum okkur og þetta er gríðarlega mikið áhyggjuefni. Við höfum rosalega miklar áhyggjur af lýðræðinu okkar.“



Hún segir að þrátt fyrir að Pia ávarpi samkomuna í krafti embættis síns sem forseti danska þjóðþingsins, verði vera hennar ekki aðskilin frá þeirri stefnu hún hefur rekið og hennar sjónarmiðum sem hún hefur barist fyrir í langan tíma.

Segir Piu vera frumkvöðul nýfasískra hreyfinga í álfunni

„Mér finnst sama hvernig ég tek þátt í því, þá væri ég að styðja við þessa hugmyndafræði sem Pia Kjærsgaard hefur verið að vinna brautargengi í allri Evrópu í tuttugu ár. Hún er einn af frumkvöðlum nýfasískra, nýrasískra hreyfinga úti um alla Evrópu. Hún er einn helsti hugmyndasmiður öldunnar sem við erum að upplifa um alla álfuna. Hún stendur fyrir mannfjandsamleg gildi sem ég get ekki með nokkrum hætti sýnt stuðning minn við og mér fannst þetta mjög erfið ákvörðun en ég fann enga aðra ákvörðun sem ég, samvisku minnar vegna, gæti látið verða af.“

Aðspurð hvort eining hafi ríkt um ákvörðunina innan þingflokksins segir Þórhildur svo vera.

„Það er eining um þetta innan þingflokksins. Við tókum þessa ákvörðun ekki af einhverri léttúð, okkur fannst þetta mjög erfitt og mér finnst þetta ennþá mjög erfitt því okkur þykir líka vænt um allan þann undirbúning sem hefur átt sér stað fyrir þessi veisluhöld og ég hefði gjarnan vilja fagna þessum áfanga á Þingvöllum en mér finnst vera hennar þarna sem heiðursgestur sem ávarpar Alþingi Íslendinga bara óforsvaranleg.“

Þórhildur segir að það liggi ekki ljóst fyrir hvernig ákvörðunin um að fá Piu til að halda ræðu var tekin en bætir við að Píratar hyggist komast að því hvenær og hvernig hún var tekin. „Fyrsta skiptið, sem við vitum til, að þetta hafi verið borið undir þingflokk Pírata var í gær. Það reyndist ekki ráðrúm til að meðtaka fyllilega hvaða þýðingu þetta hefði í för með sér“.