Byrjaði gegn KR en er nú kominn heim í Þorpið

Jóhann Helgi Hannesson er kominn aftur í heimahagana en hann skrifaði í gær undir samning við Þór á lokadegi félagsskiptagluggans.

Jóhann Helgi kemur frá Grindavík til Þórsara en hann gekk í raðir Suðurnesjaliðsins frá Þór fyrir tímabilið þar sem hann hafði leikið alla sína tíð.

Hjá Grindavík fékk kappinn nokkur tækifæri en náði ekki að setja mark sitt á liðið. Hann skoraði einungis eitt mark í þrettán leikjum og það kom í bikarleik gegn Víði.

Hann byrjaði síðasta leik Grindavíkur sem var á mánudagskvöldið gegn KR en er nú kominn heim og gæti spilað með Þór gegn Njarðvík á heimavelli í kvöld.

Þór er í toppbaráttu Inkasso-deildarinnar. Liðið er einungis þremur stigum frá toppliði HK og einu stigi á eftir ÍA og Víkingi Ólafsvík sem er í öðru og þriðja sætinu.