Mögnuð tólfta ágúst tvenna Eyjamanna á móti FH

12. ágúst er góður dagur fyrir Kristján Guðmundsson og lærisveina hans í ÍBV. Sömu sögu er ekki hægt að segja af FH. 

Eyjamenn mættu FH-ingum í Pepsi-deild karla í fótbolta í gær og endurtóku leikinn frá því nákvæmlega einu ári fyrr. Sami maður var líka hetja gærdagsins.

FH-ingar leggja eflaust fram ósk við mótastjóra KSÍ á næsta ári að þurfa ekki að spila við Eyjamenn 12. ágúst árið 2019.

Eyjamenn tryggði sér magnaða 12. ágúst tvennu á Kaplakrikavelli í gær þegar þeir unnu 2-0 sigur á FH í 16. umferð Pepsi deildar karla. 

Tvö ár í röð hefur ÍBV-liðið nú unnið óvæntan sigur á FH á þessum degi. Eyjaliðið hefur haldið marki sínu hreinu í báðum leikjunum og í því báðum hefur Gunnar Heiðar Þorvaldsson verið á skotskónum á lokamínútum fyrri hálfleiks.

Gunnar Heiðar Þorvaldsson tryggði ÍBV bikarmeistaratitilinn í fyrra með eina marki bikarúrslitaleiksins á móti FH á 37. mínútu.

Í gær komu mörk Gunnars Heiðars aftur á móti á 39. og 45. mínútu leiksins en seinna markið skoraði hann úr vítaspyrnu.

Í báðum leikjunum átti Færeyingurinn Kaj Leo í Bartalsstovu stóran þátt í undirbúningnum í fyrsta marki leiksins. 

Mörkin má sjá hér að neðan.

Bikarmeistaratitilinn var fyrsti titill Eyjamann í karlaflokki í 19 ár og með sigrinum í gær þá fjarlægðist Eyjaliðið fallbaráttuna. 

FH-liðið missti hinsvegar af bikarnum á þessum degi í fyrra og missti síðan í gær af lestinni í baráttunni um Íslandsmeistaratitilinn.



Tólfta ágúst tvenna ÍBV á móti FH

12. ágúst 2017

ÍBV vinnur 1-0 sigur á FH í bikarúrslitaleik á Laugardalsvellinum

- Gunnar Heiðar Þorvaldsson með sigurmarkið á 37. mínútu

12. ágúst 2018

ÍBV vinnur 2-0 sigur á FH í Pepsi-deildinni

- Gunnar Heiðar Þorvaldsson með mörkin á 39. og 45. mínútu