Mikil sprenging í Kópavogi

Slökkviliði höfuðborgarsvæðisins barst tilkynning um sprengingu í bílskúr við Þinghólsbraut í Kópavogi upp úr klukkan ellefu í dag. Engan sakaði samkvæmt upplýsingum frá slökkviliðinu en orsök sprengingarinnar eru óljós.

Þegar slökkviliðsmenn komu á vettvang var mikill reykur en greiðlega gekk að ráða niðurlögum eldsins sem var einnig í kjallara undir bílskúrnum sem stendur við einbýlishús á Þinghólsbraut.

Samkvæmt upplýsingum frá slökkviliðinu var mikill kraftur í sprengingunni en báðar hurðir sprungu frá bílskúrnum.

Er vinnu við það að ljúka á vettvangi og margir slökkviliðsmenn komnir aftur niður á stöð.