Haukur Heiðar kominn heim í KA

KA-menn eru heldur betur að styrkja hópinn fyrir átökin í Pepsi-deild karla næsta sumar en fjórir leikmenn skrifuðu undir samning við félagið í dag.

Stærsti bitinn var Haukur Heiðar Hauksson sem er að koma heim úr atvinnumennsku. Varnarmaðurinn hefur spilað með AIK í sænsku úrvalsdeildinni síðan 2015 en hann fór frá KA til KR árið 2012.

Haukur Heiðar getur bæði spilað sem bakvörður og miðvörður en þessi 27 ára gamli leikmaður á sjö landsleiki að baki fyrir íslenska landsliðið. Hann kemur væntanlega til með að fylla í skarð Guðmanns Þórissonar í hjarta varnarinnar hjá KR.

Almarr Ormarsson er einnig kominn heim í annað sinn en miðjumaðurinn öflugi kemur til KA frá Fjölni þar sem að hann spilaði á síðustu leiktíð. Almarr er uppalinn hjá KA og spilaði með liðinu til ársins 2008 þegar að frændi hans Þorvaldur Örlygsson fékk hann til Fram.

Almarr kom aftur heim til KA árið 2016 og hjálpaði liðinu upp í Pepsi-deildina og að halda sæti sínu þar ári síðar áður en að hann fór aftur í bæinn og féll með Fjölni í sumar.

Þriðji uppaldi KA-maðurinn sem samdi við þá gulu norðan heiða í dag er Andri Fannar Stefánsson sem hefur verið í herbúðum Vals frá árinu 2011. Andri hefur lítið spilað undanfarin tvö sumur en hann er einnig afar fær yngri flokka þjálfari.

Þá samdi KA einnig við norska vinstri bakvörðurinn Alexander Groven sem kemur frá Hönefoss en þessi 26 ára gamli leikmaður hefur einni spilað fyrir Sarpsborg og Lyn en hann á leiki að baki fyrir öll yngri landslið Noregs.

KA er nú alls búið að fá fimm leikmenn til liðs við sig en fyrr í mánuðinum gekk það frá samningi við Guðjón Pétur Lýðsson sem kom frá Val.