Fjármálafyrirtæki stofna nýja kauphöll

Nokkur stærstu fjármálafyrirtæki Bandaríkjanna hafa tekið höndum saman um stofnun nýrrar kauphallar sem ætlað er að auka samkeppni á sviði verðbréfaútgáfu og draga úr viðskiptakostnaði fjárfesta.

Fyrirtækin Fidelity Investments, TD Ameritrade, Morgan Stanley og Citadel Securities standa meðal annars að baki kauphöllinni sem fengið hefur nafnið Members Exchange eða MEMX.

Markmið stofnendanna er að veita stærstu fyrirtækjunum á umræddum markaði, fyrst og fremst New York Stock Exchange, Nasdaq og Cboe Global Markets, harða samkeppni. Hlutabréf í fyrirtækjunum þremur féllu um á bilinu tvö til þrjú prósent í verði eftir að tilkynnt var um áformin á mánudag.

Í fréttatilkynningu frá MEMX kom fram að stefnt væri að því að sækja um starfsleyfi hjá bandaríska verðbréfaeftirlitinu snemma á þessu ári en það tekur eftirlitið að jafnaði um eitt ár að afgreiða slíkar umsóknir, eftir því sem fram kemur í frétt Financial Times.

Nýjum keppinautum á borð við IEX hefur gengið erfiðlega að hasla sér völl í samkeppninni við stærstu kauphallir Bandaríkjanna en kauphallir í eigu Intercontinental Exchange, Nasdaq og Cboe ráða yfir meirihluta markaðarins.