Mannréttindastjóri segir ásakanir um kosningasvindl alvarlegar og meiðandi

Mannréttindastjóri Reykjavíkurborgar, persónuverndarfulltrúi og borgarlögmaður vinna nú að gerð minnisblaðs og nánari greiningu á ákvörðun Persónuverndar um að Reykjavíkurborg, rannsakendur við Háskóla Íslands og Þjóðskrá hafi brotið gegn þáverandi persónuverndarlögum þegar ungum kjósendum, konum 80 ára og eldri og erlendum ríkisborgurum voru send bréf og smáskilaboð fyrir síðustu sveitarstjórnarkosningar í þeim tilgangi að auka kosningaþátttöku.

Þetta kemur fram í tilkynningu frá Reykjavíkurborg.

„Borgin og þeir aðilar sem ákvörðunin fjallar um eru nú að kynna sér niðurstöðuna sem er ítarleg,“ segir í tilkynningunni en Persónuvernd hóf á síðasta ári frumkvæðisathugun á notkun umræddra aðila á persónuupplýsingum frá Þjóðskrá Íslands.

Í ákvörðun Persónuverndar kemur fram að ekki hafi farið lögum þegar ungum kjósendum, eldri konum og erlendum ríkisborgurum voru send bréf. Rannsóknir sýna að þetta eru hóparnir sem skiluðu sér verst á kjörstað. Þjóðskrá á þá einnig að hafa brotið gegn þáverandi persónuverndarlögum þegar hún afhenti Reykjavíkurborg upplýsingar um kyn og ríkisfang erlendra ríkisborgara.

Í ákvörðuninni segir jafnframt að textinn hafi verið gildishlaðinn og að í bréfum til ungs fólks sem voru að kjósa í fyrsta skiptið hefði verið talað um skyldu til að kjósa þrátt fyrir að engin slík skylda hvíli á herðum þeim í lagalegum skilningi.

Í áframhaldandi greiningu á ákvörðun Persónuverndar verður skoðað sérstaklega hvort og þá hvernig framkvæmd Reykjavíkurborgar var frábrugðin framkvæmd sambærilegra verkefna á Norðurlöndum sem þó voru fyrirmyndin að átaksverkefni Reykjavíkurborgar.

Ætluðu sér eingöngu að auka kosningaþátttöku

Anna Kristinsdóttir mannréttindastjóri Reykjavíkurborgar segist taka ákvörðun Persónuverndar alvarlega en bætir við að hún komi henni spánskt fyrir sjónir í ljósi fyrri samskipta við stofnunina. Anna segir að mikilvægt sé að bregðast við ákvörðuninni með faglegum hætti.

„Verkefnið var allt unnið af starfsmönnum Reykjavíkurborgar og fræðafólki í Háskóla Íslands þar sem okkur gekk það eitt til að auka kosningaþátttöku og fræðast um kosningahegðun. Stjórnmálamenn höfðu þannig enga aðkomu að verkefninu eftir samþykkt borgarráðs,“ segir Anna.

Hún segir enn fremur að ásakanir um kosningasvindl sem hafi komið fram í tengslum við umræðu ákvörðunar Persónuverndar séu „alvarlegar“ og „meiðandi“.