Sólveig segir ekkert geta kramið þær konur sem nú hafi fengið rödd í samfélaginu

Formaður Eflingar segir engan geta kramið þær konur sem nú hafi í fyrsta skipti eignast rödd í íslensku samfélagi með boðun verkfalls í næstu viku. Við fylgdumst með þegar formaðurinn skilaði verkfallsboðun Eflingar til réttra aðila í dag.

Atkvæðagreiðslu um boðun verkfalls ræstingarfólks og þerna innan Eflingar á hótelum og veitingastöðum á höfuðborgarsvæðinu og hluta Suðurlands lauk í gærkvöldi. Áttahundruð sextíu og tveir félagsmenn tóku þátt í atkvæðagreiðslunni og samþykktu 769 þeirra boðun verkfalls, eða 89 prósent en 67 vildu ekki boða til verkfalls og 26 atkvæðaseðlar voru auðir. Tæplega átta þúsund manns voru á kjörskrá og því greiddu um 11 prósent félagsmanna atkvæði.

Halldór Benjamín Þorbergsson framkvæmdastjóri Samtaka atvinnulífsins segir þátttöku í atkvæðagreiðslunni ekki hafa uppfyllt skilyrði laga. Þess vegan hafi samtökin kært verkfallsboðunina til félagsdóms í dag.

„Sem mun taka afstöðu til málsins og vonandi liggur sú afstaða fyrir um miðja næstu viku. Það eru mörg álitaefni í þessu og gott að félagsdómur fái tækifæri til að taka afstöðu til þess, sagði Halldór Benjamín þar sem hann var á leið til fundar við samninganefnd Starfsgreinasambandsins hjá ríkissáttasemjara. „Hér munum við sitja í Karphúsinu næstu daga frá morgni til kvölds með það að markmiði að ná kjarasamningi. Núna er ég orðinn of seinn á fundinn og verð að fá að þjóta,” sagði framkvæmdastjóri Samtaka atvinnulífsins.

Um leið og hann hvarf upp með lyftunni upp á fjórðu hæð í Karphúsinu gekk Sólveig Anna Jónsdóttir hröðum skrefum inn í Karphúsið til að afhenda ríkissáttasemjara verkfallsboðun.

Efast ekki um að verkfallsboðunin gildi

Nú eru uppi efasemdir um næga þátttöku í atkvæðagreiðslunni. Hvað segir þú um það?

„Við höfnum því öllu. Við fórum af stað með bílinn í þeim tilgangi að ná til þess hóps sem er jaðarsettastur á íslenskum vinumarkaði.” Mér sýnist þátttakan vera um 11% en þarf ekki 20% þátttöku?

„Nei það þarf ekki tuttugu prósent. Það er eitthvað svona túlkunaratriði. Þá langar mig aftur að fá að leggja áherslu á að þeir sem starfa undir þessum samningi, hótel- og veitingasamningnum, er mestmegnis aðflutt verkafólk. Þetta er fólkið sem hefur komið hingað inn til að halda uppi hagvextinum. Til að vinna vinnuna. Sem hefur mætt ótrúlegri framkomu. Er látið vinna á ótrúlega lélegum launum,” sagði formaður Eflingar.

Dómur félagsdóms breyti ekki stöðunni sem uppi sé.

„Sama hvað gerist í Félagsdómi er enginn að fara að stoppa okkur núna. Það er enginn að fara getað kramið þessar konur sem hafa núna stigið fram. Sem hafa í fyrsta skipti fengið rödd í þessu samfélagi og fengið tækifæri til að láta vilja sinn í ljós.” 

Frá ríkissáttasemjara lá leið Eflingar-rútunnar í húsakynni Samtaka atvinnulífsins þar sem einnig þurfti að afhenda verkfallsboðunina. Hvort sem hún er nú lögleg eða ekki. Þar var kvittað fyrir móttökunni og nú er bara að bíða þess sem koma skal í næstu viku.