Reyndi að smygla 37 kókaín­pakkningum til landsins

Kona á þrítugsaldri frá Brasilíu sætir nú gæsluvarðhaldi eftir að hafa reynt að smygla 37 pakkningum af kókaíni til landsins í síðasta mánuði.

Í tilkynningu frá lögreglunni á Suðurnesjum segir að konan hafi verið að koma frá Madríd á Spáni þegar tollgæslan í Flugstöð Leifs Eiríkssonar stöðvaði hana.

„Lögreglan á Suðurnesjum handtók hana og færði á lögreglustöð. Þar skilaði hún af sér efnunum sem hún hafði komið fyrir í leggöngum, maga og meltingarvegi.

Samtals var um að ræða 400 grömm af kókaíni. Við skýrslutöku hjá lögreglu kvaðst hún hafa átt að fá 7000 evrur eða tæplega eina milljón íslenskra króna fyrir flutninginn,“ segir í tilkynningunni.