Setti aleiguna í WOW: Trúir því að með „aðeins meiri tíma“ hefði tekist að bjarga félaginu

Skúli Mogensen, stofnandi WOW air, segist trúa því að ef hann og aðrir forsvarsmenn flugfélagins hefðu fengið aðeins meiri tíma, hefði verið hægt að bjarga félaginu frá gjaldþroti. Viðræður um fjármögnun rekstursins stóðu yfir í alla nótt og til sjö í morgun en þegar flugvélar voru kyrrsettar í Bandaríkjunum hafi hlutirnir gerst mjög hratt. Þetta sagði Skúli í viðtali við Ríkisútvarpið sem sýnt var í hádeginu.

Skúli sagði stöðuna hafa verið flókna. Flugrekstur væri flókinn og margir aðilar ættu kröfur í WOW air.

„Við náðum vissulega góðum áfanga þegar skuldabréfaeigendur samþykktu að breyta þessu í hlutafé en þá voru eftir fjöldinn allur af öðrum kröfuhöfum og eins ég segi, þegar svona margir þurfa að koma saman, og fjöldi aðila í mörgum löndum, og tíminn er knappur. Það bara, því miður, náðist ekki,“ sagði Skúli.

Segist eiginlega hafa verið þvingaður til þess að gefast upp

Hann sagði einnig að flugumhverfið hafi verið sérstaklega erfitt í vetur og fjöldi flugfélaga hafi farið í þrot. Hann hins vegar trúir því að „að ef við hefðum fengið aðeins meiri tíma hefðum við getað klárað þetta.“

Skúli, sem sagðist hafa sett aleiguna í rekstur WOW air, sagði ennfremur að hann hefði átt að hefja endurskipulagningu WOW er fyrr. Það hafi skilað miklum árangri að skila breiðþotunum, taka til í rekstrinum og „fara aftur í lággjaldabúninginn“.

Varðandi það að Skúli hafi fyrir tveimur dögum sagst ekki ætla að gefast upp, segist Skúli eiginlega hafa verið þvingaður til þess. Hann hafi þurft að sætta sig við staðreynd málsins.

„Auðvitað er þetta búið að vera mikil barátta og eins og ég sagði líka um daginn, og hef reyndar sagt ítrekað. En ég er líka óheyrilega þakklátur fyrir þann mikla stuðning og hvatningu frá starfsfólki mínum, frá fólki út um allan bæ og fjölda landa, einmitt um það að halda áfram og gefast ekki upp. Því fólk, greinilega, hafði trú á okkur og vildi sjá okkur halda áfram. Það var ekki síst sú hvatning sem hvatti okkur áfram. Mér finnst náttúrulega mjög leiðinlegt og sorglegt að bregðast því fólki. Auðvitað liggur það ljóst fyrir að þegar flugvélarnar eru kyrrsettar, þá er þetta búið.“

Skúli sagðist ekki vera með nákvæma tölu á farþegum sem væru strandaglópar en taldi þá rúmlega þúsund. Hann sagðist sömuleiðis ekki vera með á hreinu hve margir hefðu keypt flugmiða til framtíðar.

„Þetta er því miður úr okkar höndum núna og mér þykir það mjög sárt. Því þetta fólk hefur haft trú á okkur og stutt okkur og í raun magnað hvað við höfum fengið góðan meðbyr frá farþegum okkar frá fyrsta degi. Þannig að ég er ekki síst svekktur að geta ekki staðið við skuldbindingar okkar gagnvart þessu fólki.“