Fim­leika­fé­lagið: Sjáðu hvað gerist inni í klefa hjá Hafnar­fjarðar­risanum

Þættirnir Fimleikafélagið sem Freyr Árnason gerði síðasta sumar um leikmenn FH í Pepsi-deild karla í fótbolta vöktu mikla athygli en fyrsti þáttur annarrar seríu er kominn út og er sýndur hér á Vísi.

Í þáttunum gefst FH-ingum og öðrum áhugamönnum um íslenskan fótbolta tækifæri til að skyggnast á bak við tjöldin hjá risanum í Hafnarfirði en myndavélin er bæði inn í klefa og í þjálfaraherberginu.

„Fyrsta sería fékk mjög góð viðbrögð og frábært áhorf. Við sáum þá að það er mikill áhugi á því hvað gerist í hinum lokaða heimi knattspyrnunnar á milli leikja,“ segir Freyr við Vísi en hver var upphaflega hugmyndin?

„Í rauninni þróaðist hugmyndin út frá því að við Biggi og Axel [starfsmenn FH] vorum að ræða um að gera einhver 10-15 sekúndna lifandi myndbönd til að auglýsa leiki yfir sumartímann. Bara tæklingar í slow motion og einhver hreyfigrafík með. Þetta þróaðist yfir í það hvort við gætum sýnt eitthvað sem áhorfendur sjá ekki vanalega eins og liðið í klefanum fyrir leik.“

„Þegar Axel nefndi síðan að Jónatan Ingi, sem var nýkominn í FH frá AZ Alkmaar og allir héldu að væri að lifa einhverjum glamúr boltalífsstíl, væri alltaf upp í Kaplakrika að þvo af liðinu og pumpa í bolta þá föttuðum við að það væri endalaust af svona litlum sögum sem væru gott TV. Svo við ákváðum bara keyra á þetta með hjálp frá okkar mönnum í Sony,“ segir Freyr.

Hann stefnir á að gera tíu þætti sem frumsýndir verða á Vísi á föstudögum en fyrsta þáttinn í nýju seríunni má sjá hér að ofan.