Jafnt í Íslendingaslag í Rostov

Jón Guðni Fjóluson lék allan leikinn fyrir Krasnodar sem gerði 1-1 jafntefli við Rostov í Íslendingaslag í rússnesku úrvalsdeildinni í dag.

Jón Guðni var einnig í byrjunarliði Krasnodar þegar liðið vann 2-0 sigur á CSKA Moskvu í öðrum Íslendingaslag í síðustu umferð. Krasnodar er í 3. sæti deildarinnar með 47 stig, ellefu stigum á eftir toppliði Zenit.

Björn Bergmann Sigurðarson kom inn á sem varamaður í uppbótartíma hjá Rostov en Ragnar Sigurðsson lék ekki með liðinu í dag. Rostov, sem er án sigurs í síðustu fjórum leikjum sínum, er í 7. sæti deildarinnar.

Sverrir Ingi Ingason stóð vaktina í vörn PAOK sem vann 0-2 sigur á Giannina í lokaumferð grísku úrvalsdeildarinnar. PAOK var búið að tryggja sér gríska meistaratitilinn.

Ögmundur Kristinsson stóð á milli stanganna hjá Larissa sem tapaði 0-3 fyrir Olympiakos á heimavelli. Larissa endaði í 10. sæti af 16 liðum.