Valsmenn hafa verið langmest með boltann í fyrstu þremur umferðunum

Íslandsmeistarar Vals sitja við botn Pepsi Max deildar karla eftir þrjár fyrstu umferðir með aðeins eitt stig af níu mögulegum.

Valsmenn hafa ekki náð að vinna leik og björguðu eina stiginu í lok fyrsta leiksins á móti Víkingi.

Það hefur verið talsvert um fréttir af framherjum Valsliðsins sem er kannski ekkert skrýtið þegar tölfræðin frá Instat er skoðuð nánar.

Það vekur nefnilega talsverða athygli að þrátt fyrir þetta slæma gengi hefur Valsliðið verið langmest allra liða með boltann í fyrstu þremur umferðunum. Þrátt fyrir það eru Valsmenn aðeins í áttunda sæti yfir sköpuð marktækifæri og í sjötta sæti yfir flest reynd skot.

Valsmenn hafa verið með boltann 61 prósent í sínum leikjum sem er sex prósentum meira en næsta lið sem er Stjarnan. ÍA og HK hafa verið minnst með boltann eða aðeins 41 prósent hvort lið.

Valsmenn töpuðu síðasta leik á móti ÍA þrátt fyrir að vera með boltann 71 prósent af leiktímanum og eiga 458 fleiri heppnaðar sendingar (624) en Skagamenn (166) í leiknum.

Valsmenn áttu fleiri heppnaðar sendingar í bæði fyrri og seinni hálfleik en Skagamenn áttu í öllum leiknum samanlagt.

Lið hlutfallslega mest með boltann í Pepsi Max deild karla 2019:

(Eftir þrjár umferðir, tölfræði frá Instat)

1. Valur 61%

2. Stjarnan 55%

3. FH 54%

4. Fylkir 54%

5. Víkingur 52%

6. Breiðablik 52%

7. Grindavík 52%

8. KR 49%

9. KA 46%

10. ÍBV 43%

11. HK 41%

12. ÍA 41%

Fjórða umferð Pepsi Max deildar karla hefst í kvöld með fjórum leikjum. Þá mætast HK-ÍBV (Klukkan 18.45 í Kórnum í Kópavogi), Víkingur-Stjarnan (Klukkan 19.15 á Eimskipsvellinum í Laugardal), KA-Breiðablik (Klukkan 19.14 á Greifavellinum á Akureyri) og ÍA-FH (Klukkan 19.15 á Norðurálsvellinum á Akranesi).

Leikur Skagamanna og FH-inga verður sýndur beint á Stöð 2 Sport.