Halda börnum í yfirfullum skýlum lengur en lög gera ráð fyrir

Bandarísk innflytjendayfirvöld halda hundruðum barna sem hafa komið ein yfir landamærin að Mexíkó í yfirfullum skýlum meira en tvöfalt lengur en lög heimila. Sex börn hafa látist í haldi bandarískra alríkisyfirvalda frá því í september.

Lög gera ráð fyrir að eftir að bandarískir landamæraverðir taka á móti bönum sem koma án forráðamanna yfir landamærin eigi að senda þau í umsjón heilbrigðisyfirvalda innan 72 klukkustunda. Þau reka skýli sem eru talin barnvænni en þau sem landamæraeftirlitið heldur úti.

Gríðarlegur straumur flóttafólks frá Mið-Ameríku undanfarna mánuði og skriffinnska opinberra stofnana hefur þýtt að óafgreidd mál hafa hrannast upp. Washington Post segir að samkvæmt gögnum sem blaðið hefur undir höndum sé stór hluti þeirra um tvö þúsund barna sem komu ein yfir landamærin og eru í haldi landamæraeftirlitsins sitji í yfirfullum skýlum lengur en lögin heimila. Þeirra á meðal séu börn tólf ára eða yngri.

Einn heimildarmaður blaðsins segir að um þúsund börn hafi verið í skýlunum lengur en þrjá sólahringa. Annar segir að fleiri en 250 börn tólf ára eða yngri hafi verið í haldi í sex daga að meðaltali.

Sérfræðingar segja að börn séu sérstaklega viðkvæm fyrir því að vera haldið við aðstæður sem þessar. Vistin þar sé þeim andlegt áfall. Mörg þeirra upplifi síðar martraðir og endurlit um dvölina í skýlunum.

Skýlin ekki byggð fyrir langtímavistun

Að meðaltali hefur tugum þúsunda barna verið haldið í fjóra sólahringa að meðaltali undanfarna mánuði. Í sumum tilfellum séu allt að tvöfalt fleiri börn í skýlunum en þeim var ætlað að hýsa. Dæmi séu um að börn sofi á mottum á gólfinu.

„Aðstaðan okkar er ekki byggð fyrir langtímavistun og hún er sannarlega ekki byggð til að hýsa börn í langan tíma,“ segir embættismaður landamæraeftirlitsins við Washington Post.

Heilbrigðisyfirvöld segja að þau viti af um tvö þúsund börnum sem séu í haldi og bíði þess að vera flutt í betri aðstæður. Pláss sé til fyrir þau en ráðuneytið segist ekki bera ábyrgð á börnunum fyrr en þau eru flutt í hald þess. Landamærayfirvöld hafa aftur á móti ekki undan að taka við börnum og skrá þau.

Alls hafa um 45.000 börn komið yfir landamærin án forráðamanna frá því í október samkvæmt upplýsingum bandarísku alríkisstjórnarinnar. Af þeim segjast yfirvöld hafa sent áfram tæplega 41.000 börn í lok apríl.  Um miðjan maí segjast heilbrigðisyfirvöld hafa haft um 13.200 börn í sinni vörslu.

Mörg barnanna eru sögð veikjast í margmenninu í skýlunum. Hlaupabóla og maurakláði hefur komið upp í skýlunum undanfarnar vikur. Þá lést unglingur úr inflúensu í skýli landamærayfirvalda í Río Grande-dalnum í síðustu viku.

Alls hafa sex börn látist í haldi yfirvalda frá því í haust. Fimm þeirra voru frá Gvatemala og eitt frá El Salvador.

Auk barnanna sem hafa komið ein yfir landamærin eru bandarísk yfirvöld með í haldi börn sem þau skildu frá foreldrum sínum í fyrra. Það var gert samkvæmt nýrri stefnu ríkisstjórnar Donalds Trump forseta sem átti að fæla fólk frá því að reyna að komast yfir landamærin til Bandaríkjanna. Málaferli hafa staðið yfir til að skikka yfirvöld til að koma börnunum aftur í hendur foreldra sinna. Þau hafa borið því við að þau eigi erfitt með það, meðal annars vegna þess hversu illa var haldið utan um skráningu á börnunum.