Ók af vettvangi með þrjú hjól undir bílnum

Ökumaður sem átti aðild að umferðaróhappi yfirgaf vettvang óhappsins með þrjú hjól undir bílnum en þetta kemur fram í dagbók lögreglunnar á höfuðborgarsvæðinu.

Maðurinn var handtekinn skömmu síðar en bifreið hans hafði hafnað utan vegar. Málið er nú til rannsóknar og liggja því ekki frekari upplýsingar fyrir.

Þá var tilkynnt um slys í Hafnarfirði um hádegisbil þar sem fimmtán ára drengur hafði dottið af vespu. Drengurinn var með þónokkra áverka eftir fallið.

Einn ökumaður var handtekinn vegna gruns um akstur undir áhrifum fíkniefna á höfuðborgarsvæðinu og var hann sviptur ökuréttindum. Hann var síðar látinn laus eftir sýnatöku.