Skúli ekki hluti af „We are back“ air

Hópur fjárfesta ásamt tveimur fyrrverandi stjórnendum WOW air vinna að því, í samfloti við írskan fjárfestingarsjóð, sem tengist lággjaldaflugfélaginu Ryanair, að stofna nýtt Íslenskt flugfélag. Vinnuheiti nýja félagsins we WAB air en WAB er skammstöfun fyrir We Are Back.

Framkvæmdastjóri samtaka ferðaþjónustunnar segir það liggja ljóst fyrir að þetta muni hjálpa ferðaþjónustunni verði þetta að veruleika. Haustið verði þungt fyrir mörg fyrirtæki og nauðsynlegt sé að auka sætaframboð til landsins.

Leita að fyrirgreiðslu til að geta tekið lán í Sviss

Hópurinn hefur leitað til að minnsta kosti tveggja banka hér á landi og óskað eftir láni upp á 31 milljón evra, sem eru um fjórir milljarðar íslenskra króna. Írski sjóðurinn sem ber heitið Avianta Capital mun eignast 75 prósenta hlut í hinu nýja flugfélagi á móti 25 prósenta hlut félagsins Neo.

Neo er í eigu Arnars Más Magnúsonar, fyrrverandi framkvæmdastjóra flugrekstrarsviðs WOW air, Sveins Inga Steinþórssonar, sem stýrði hagdeild WOW air og sat í framkvæmdastjórn flugfélagsins, Boga Guðmundssonar, lögmanns hjá Atlantik Legal Serv ices og stjórnarformanns BusTravel, og Þórodds Ara Þóroddssonar sem hefur starfað sem ráðgjafi í flugvélaviðskiptum í Lundúnum.

Frá þessu var greint í Markaðnum í dag. Þar segir einnig að fái hópurinn fyrirgreiðslu hjá íslenskum banka, muni hann í kjölfarið nýta lánsféð sem eigið fé til þess að slá lán hjá Svissneskum banka.

Sveinn Ingi segir í samtali við RÚV að nýja flugfélagið hafi vinnuheitið WAB air sem sé skammstöfun fyrir We Are Back, eða við höfum snúið aftur. Þá staðfestir Skúli Mogensen, fyrrverandi forstjóri WOW air og stofnandi, að hann hafi enga aðkomu að stofnun nýs flugfélags.

„Það er spurning hvernig lánastofnanir taka í að veita fjármagn í svona starfsemi eftir það sem á undan er gengið. Það er ekki víst að það gangi snuðrulaust fyrir sig. Fer eftir því hvernig grunnplanið er. Það er alveg ljóst ef það bætir í flugframboð með nýju íslensku flugfélagi verði það jákvæðar fréttir yfir ferðaþjónustuna í heild sinni,“ segir Jóhannes Þór Skúlason, framkvæmdastjóri SAF.

Avianta Capital hefur skuldbundið sig ti lað leggja hinu nýja flugfélagi 5,1 milljarð og er stefnt að því að ráða 500 starfsmenn á næstu tólf mánuðum.

„Í haust þá verða menn að treysta á að fá inn september og október sem góða mánuði. Það er ekki alveg á vísan að róa með það. Bókunarstaðan er ekki góð. Það hefur að hluta til að gera með framboð á sætum. Hvort sem það væri nýtt íslenskt flugfélag eða ákvarðanir annarra flugfélaga um að bæta í framboð, það myndi klárlega hjálpa ferðaþjónustu fyrirtækjum,“ segir Jóhannes Þór.