Úr Víkinni í Þorpið

Rick Ten Voorde er á förum frá Víkingi R. til Þórs á Akureyri samkvæmt heimildum Fótbolta.net.

Hollendingurinn kom til Víkings fyrir síðasta tímabil. Hann skoraði fjögur mörk í 18 deildarleikjum í fyrra og auk eins marks í tveimur bikarleikjum.

Í sumar hefur Ten Voorde skorað eitt mark í átta leikjum í Pepsi Max-deildinni. Fjögur af fimm deildarmörkum hans fyrir Víking hafa komið úr vítaspyrnum.

Ten Voorde hefur ekkert komið við sögu hjá Víkingi síðan í 2-1 sigrinum á HK 14. júní.

Þór er í 3. sæti Inkasso-deildarinnar með 19 stig, þremur stigum á eftir toppliði Fjölnis.