Fimm daga kyrrsetningu aflétt

Flugmálayfirvöld afléttu í gærkvöldi kyrrsetningu á GA8 Airvan flugvélum, sem kyrrsettar voru fyrir tæpri viku vegna flugslyss í Umeå í Svíþjóð.

Þorvaldur Lúðvík Sigurjónsson, framkvæmdastjóri Circle Air, greinir frá þessu í tilkynningu sem hann sendi frá sér í nótt. Circle Air, sem gerir út þyrlur og flugvélar frá Akureyri, er með tvær sambærilegar vélar í notkun.

Níu fórust í slysinu í Svíþjóð, þegar vél þessarar gerðar brotlenti á eyjunni Storsandskär um miðjan júlímánuð, en flugmálayfirvöld í Evrópusambandinu, Ástralíu og Nýja-Sjálandi ákváðu að kyrrsetja vélarnar um liðna helgi.

Fyrstu rannsóknir á slysinu benda til að slysið megi ekki rekja til hönnunar- eða smíðagalla - „heldur óskyldra atriða sem snerta hvorki flughæfi né öryggi flugvéla af þessari tegund,“ eins og Þorvaldur kemst að orði. Af þeim sökum hafi kyrrsetningunni verið aflétt, fimm dögum eftir að henni var komið á.

Þorvaldur segir að með ákvörðun flugmálayfirvalda geti fyrirtæki hans tekið vélarnar sínar „tafarlaust“ í notkun aftur. Áhrif kyrrsetningarinnar hafi þó verið lágmörkuð „með ýmis konar aðgerðum og samvinnu við aðra flugrekendur,“ að sögn Þorvaldar.