Með sex krukkur af kannabisefnum og tjald til ræktunar á heimilinu

Karlmaður sem lögreglan á Suðurnesjum handtók um helgina játaði framleiðslu og vörslu fíkniefna. Maðurinn neitaði hins vegar að hafa stundað sölu á efnum. Þetta kemur fram í tilkynningu frá lögreglu.

Í íbúð mannsins sem lögregla gerði húsleit í að fenginni heimild fannst talsvert magn af kannabisefnum í sex krukkum. Einnig fundust kannabisefni í poka. Þá var á staðnum tjald sem búið var að setja upp fyrir kannabisræktun.

Maðurinn hafði jafnframt í fórum sínum tugi þúsunda í íslenskum krónum og pólskum slotum og voru þeir fjármunir haldlagðir í þágu rannsóknarinnar.

Þá hafði lögregla afskipti af fáeinum einstaklingum um helgina sem voru með meint fíkniefni í fórum sínum. Um var að ræða minniháttar magn í öllum tilvikum og voru málin afgreidd með vettvangsskýrslum.