Meiðsli Salah ekki alvarleg

Stuðningsmenn Liverpool geta andað léttar í ljósi ummæla Jurgen Klopp, stjóra liðsins, að meiðsli egypska sóknarmannsins Mohamed Salah séu ekki alvarleg.

Salah kenndi sér meins í ökkla og var skipt af velli á 85.mínútu í 2-1 sigri á Tottenham í gær. Skömmu áður hafði Salah tryggt liðinu sigurinn með marki úr vítaspyrnu en um síðustu helgi sást bersýnilega að liðið þolir illa fjarveru Egyptans þar sem sóknarleikur liðsins í 1-1 jafntefli gegn Man Utd var ekki beysinn.

„Þetta er ekkert alvarlegt. Þetta er sama ökklavandamál og verið hefur og það versnar eftir því sem líður á leikinn. Hann mun jafna sig fljótt,“ sagði Klopp eftir leikinn í gær.