Innlent

Segir flugskýlið sem borgin vill rífa með merkustu flugminjum Íslands

Kristján Már Unnarsson skrifar
TF-ÖRN við sjóflugskýlið í Skerjafirði fyrir tíma Reykjavíkurflugvallar en vélinni var rennt á teinum út í sjó. Flugfélag Akureyrar, síðar Flugfélag Íslands, byggði skýlið yfir TF-ÖRN, sem Icelandair telur fyrstu flugvél félagsins. Myndin er úr bók Arngríms Sigurðssonar, Annálar íslenskra flugmála 1936-1938, sem Íslenska flugsögufélagið gaf út. Haukur Claessen, síðar varaflugmálastjóri, tók ljósmyndina.
TF-ÖRN við sjóflugskýlið í Skerjafirði fyrir tíma Reykjavíkurflugvallar en vélinni var rennt á teinum út í sjó. Flugfélag Akureyrar, síðar Flugfélag Íslands, byggði skýlið yfir TF-ÖRN, sem Icelandair telur fyrstu flugvél félagsins. Myndin er úr bók Arngríms Sigurðssonar, Annálar íslenskra flugmála 1936-1938, sem Íslenska flugsögufélagið gaf út. Haukur Claessen, síðar varaflugmálastjóri, tók ljósmyndina. Mynd/Haukur Claessen.

Höfundur bókarinnar um Flugsögu Íslands hefur óskað eftir því að Minjastofnun grípi til skyndifriðunar til að koma í veg fyrir að borgin rífi flugskýli í Skerjafirði. Hann segir skýlið frá tíma sjóflugvélanna, eldra en flugvöllinn, og einhverjar merkustu minjar um upphaf atvinnuflugs á Íslandi. Þetta kom fram í fréttum Stöðvar 2.

Forstjóri Flugfélagsins Ernis sagði frá því í gær að borgin hefði tilkynnt að vegna nýs skipulags ætti að rífa flugskýli félagsins í Skerjafirði.

Eggert Norðdahl, höfundur bókarinnar Flugsaga Íslands. Hann vill að Minjastofnun beiti skyndifriðun til að hindra borgaryfirvöld í að rífa flugskýlið.Stöð 2/Arnar Halldórsson.

„Mér eiginlega bara snarbrá vegna þess að þetta er elsta uppistandandi bygging á flugvallarsvæðinu og að grunninum til er hún algerlega íslensk, frá því fyrir stríð,“ segir flugáhugamaðurinn Eggert Norðdahl, höfundur Flugsögu Íslands.

Flugskýlið er nefnilega ekki stríðsminjar, eins og flest önnur skýli á vellinum, heldur segir Eggert að það sé byggt árið 1938. Skýlið sé frá árum sjóflugvélanna og því íslenskar flugminjar frá því fyrir tíma Reykjavíkurflugvallar en frá skýlinu lá skábraut niður í sjó.

Reykjavíkurflugvöllur 9. júní árið 1942. Á myndinni sést sjóflugskýlið neðarlega til vinstri. Breski herinn tók skýlið yfir um tíma á stríðsárunum en skilaði því svo fljótlega aftur til Flugfélags Íslands, sem lét stækka það árið 1942.Mynd/Þjóðskjalasafn Bandaríkjanna.

Eggert segir skýlið ómetanlegar flugminjar.

„Vegna þess að þetta er elsta uppistandandi flugskýli á Íslandi, svo ég viti til.“ 

Eggert setur þó þá fyrirvara að vera kunni að eldra skýli, sem rifið var á Akureyri, hafi síðar verið endurreist úti í sveit. Þá sé hluti skýlis á Sandskeiði frá sama tíma.

Eggert segist strax í morgun hafa sent erindi til Minjastofnunar. Hann vill skyndifriðun enda hafi skýlið verið byggt yfir TF-ÖRN, sjóflugvélina sem markaði upphaf samfellds atvinnuflugs á Íslandi og telst fyrsta flugvél í sögu Icelandair.

Flugskýlið sést betur þegar myndin að ofan frá árinu 1942 er stækkuð. Sjá má nokkra Catalinu-flugbáta bandaríska hersins en einnig Beechcraft-vél Flugfélags Íslands, TF-ISL, á akbrautinni við flugbrautina.Mynd/Þjóðskjalasafn Bandaríkjanna.

„Þetta er tvímælalaust bara upphaf atvinnuflugs á Íslandi, svona fyrir utan Junkers-flugbátana, flugvélarnar sem voru á flotbátum hérna 1928 til 1931. Ef þú myndir finna Junkers-vél, þá er hún kannski merkilegri, en þetta er bara það almerkilegasta sem til er.

Og það eru svo fáir sem átta sig á því að þetta er þarna, bara í upphaflegri mynd, í fullri notkun,“ segir Eggert Norðdahl.

Flugskýlið var tekið notkun árið 1938 en er núna í eigu Flugfélagsins Ernis. Reykjavíkurborg hefur tilkynnt félaginu að skýlið verði rifið þar sem búið sé að skipuleggja þar veg.Stöð 2/Friðrik Þór Halldórsson.

Samgönguráðherra var einnig brugðið við fréttirnar af tilkynningu borgaryfirvalda til Flugfélagsins Ernis.

„Ég verð að segja eins og er að mér finnst það illskiljanlegt, sem gömlum sveitarstjórnarmanni, ef satt reynist, að það sé gengið svona fram gagnvart fyrirtæki sem hefur starfað og þjónustað borgarana hér um áratugaskeið, og eiginlega hálf ómannleg nálgun, ef satt reynist. En ég ætla að skoða málið,“ sagði Sigurður Ingi Jóhannsson, samgöngu- og sveitarstjórnarráðherra.

Hér má sjá frétt Stöðvar 2:

Reykjavíkurflugvöllur Fréttir af flugi Borgarstjórn Skipulag Fornminjar Húsavernd

Tengdar fréttir

Borgin tilkynnir Flugfélaginu Erni að rífa eigi viðhaldsstöð félagsins

Reykjavíkurborg hefur tilkynnt Flugfélaginu Erni að rífa eigi viðhaldsstöð félagsins á Reykjavíkurflugvelli bótalaust vegna nýs skipulags. Forstjórinn Hörður Guðmundsson kallar þetta árás á innanlandsflugið enda geti þetta leitt til þess að starfsemi félagsins leggist af.

Segir nýja byggð í Skerjafirði atlögu gagnvart flugvellinum

Áform borgarstjórnarmeirihlutans um nýja byggð í Skerjafirði, sem kynnt verða á morgun, eru atlaga að Reykjavíkurflugvelli og skemmdarverk af stærstu gráðu, að mati Vigdísar Hauksdóttur, borgarfulltrúa Miðflokksins.

Mest lesið


Fleiri fréttir

Sjá meira


×

Mest lesið