Þingmaður Miðflokksins studdi ekki Jón Þór til formennsku og Sjálfstæðismenn mættu ekki á fundinn

Starfsáætlun Alþingis hefur verið tekin úr sambandi en eldhúsdagsumræður fara þó fram á morgun. Nýr formaður stjórnskipunar- og eftirlitsnefndar var kjörinn í morgun.

Þórhildur Sunna Ævarsdóttir, þingmaður Pírata, sagði af sér formennsku í stjórnskipunar- og eftirlitsnefnd í síðustu viku. Jón Þór Ólafsson flokksbróðir hennar var formlega skipaður formaður í hennar stað á fundi nefndarinnar í morgun með atkvæðum þriggja nefndarmanna minnihluta. 

Þorsteinn Sæmundsson, þingmaður Miðflokksins greiddi einn nefndarmanna atkvæði gegn tillögu um skipun Jóns Þórs sem formanns nefndarinnar en þingmenn Framsóknarflokks og Vinstri grænna sátu hjá. Þingmenn Sjálfstæðisflokksins sem sæti eiga í nefndinni, Brynjar Níelsson og Óli Björn Kárason, mættu ekki á fundinn.

Líneik Anna Sævarsdóttir, þingmaður Framsóknarflokksins og varaformaður nefndarinnar, lagði fram bókun á fundinum sem þingmennirnir Kolbeinn Óttarsson Proppé og Þórunn Egilsdóttir tóku undir.

„Við upphaf þessa kjörtímabils var gengið frá heildarsamkomulagi milli ríkisstjórnarflokkanna og stjórnarandstöðuflokkanna um skiptingu embætta í nefndum þingsins í samræmi við ákvæði þingskapa. Í því fólst meðal annars að tiltekin formannsembætti kæmu í hlut stjórnarandstöðunnar og skiptust þau svo milli flokkanna innbyrðis samkvæmt þeirra samkomulagi. Í ljósi heildarsamkomulagsins lít ég þannig á það sé ekki mitt hlutverk að taka afstöðu til þess hvernig stjórnarandstaðan hagar þessari skiptingu eða hvaða þingmenn eru tilnefndir af hálfu einstakra flokka," segir í bókuninni.

Telja frumkvæðisathugun á hæfi Kristjáns Þórs sjálfsagða

Nokkur spenna hefur ríkt innan nefndarinnar að undanförnu, einkum vegna ólíkra sjónarmiða meiri- og minnihluta vegna frumkvæðisathugunar á hæfi Kristjáns Þórs Júlíussonar í ljósi stöðu hans gagnvart Samherja. Meirihluti nefndarinnar lagði til að málinu yrði hætt í ljósi þess að skoðun nefndarinnar hefði leitt í ljós að ekkert væri við störf Kristjáns Þórs að athuga í ljósi stöðu hans gangvart Samherja. Hann hefði engra hagsmuna að gæta, að því er fram kom í bókun meiri hlutans.

Framganga meirihluta nefndarinnar í því máli var að sögn Þórhildar Sunnu dropinn sem fyllti mælinn sem leiddi til afsagnar hennar úr formennsku.

Um helgina sendi meirihluti nefndarinnar frá sér yfirlýsingu þar sem ásökunum Þórhildar Sunnu er mótmælt. Við því brugðust þingmennirnir Guðmundur Andri Thorsson og Andrés Ingi Jónsson í bókun sem þeir lögðu fram á fundi nefndarinnar í morgun.

„Yfirlýsing meirihluta stjórnskipunar- og eftirlitsnefndar frá 20. júní sl. leiðir í sjálfu sér ekki annað í ljós en að frá upphafi hefur ríkt mikil tregða við það innan nefndarinnar að tekið sé til skoðunar hæfi sjávarútvegs- og landbúnaðarráðherra þegar kemur að málefnum Samherja,“ segir meðal annars í bókuninni sem Guðmundur Andri birti í heild sinni á Facebook í morgun.

„Andstætt því sem þráfaldlega hefur komið fram í máli nokkurra nefndarmanna teljum við að tengsl ráðherrans við Samherja séu svo sterk að sjálfsagt hafi verið að nefndin tæki hæfi hans til sjálfstæðrar skoðunar,“ segir ennfremur í bókuninni.

Sent var erindi til forseta Alþingis og kallað eftir svörum hans við því hvernig væri réttast að ljúka frumkvæðisathugunum almennt. Í bókun Guðmundar Andra og Andrésar Inga segir að svo virðist sem meirihluta nefndarinnar hafi legið svo á að loka frumkvæðisathugun á hæfi Kristjáns Þórs að hann treysti sér ekki til að birta niðurstöður forseta um hvernig beri að ljúka slíkum málum.

„Forseti nefnir sjö leiðir, þar á meðal þá sem meirihlutinn valdi í þessu máli. Þær málalyktir sýna að meirihluti nefndarinnar telur ekki að tengsl sjávarútvegs- og landbúnaðarráðherra við Samherja þurfi sérstakrar skoðunar við. Við erum ósammála því mati,“ segir í bókuninni.

„Hitt er umhugsunarvert að út frá túlkun forseta virðist meirihluti nefndarinnar hverju sinni hafa möguleika á því að kæfa frumkvæðisathuganir á verklagi eða hæfi ráðherra sama daginn og minnihlutinn fer fram á þær, en slík málalok grafa undan þeirri vernd sem minnihluti nefndarinnar þarf að njóta til að sýna framkvæmdavaldinu nauðsynlegt aðhald hverju sinni.“

Fréttin hefur verið uppfærð.