Starfsáætlun tekin úr sambandi í annað sinn á vorþingi

Starfsáætlun Alþingis hefur verið tekin úr sambandi en eldhúsdagsumræður fara þó fram á morgun. Nú er kapp lagt á að ljúka þingstörfum en ólíklegt er að það takist að afgreiða öll þau mál sem stefnt er á að klára fyrir sumarfrí í þessari viku, líkt og starfsáætlun gerði ráð fyrir.

Við upphaf þingfundar í morgun tilkynnti Steingrímur J. Sigfússon forseti Alþingis að forsætisnefnd hafi ákveðið í morgun að taka starfsáætlunina úr sambandi. Samkvæmt henni var gert ráð fyrir að þingi yrði frestað frá og með næstkomandi fimmtudegi.

Þetta er í annað sinn á þessu vorþingi sem starfsáætlun er tekin úr sambandi en það var líka gert í mars í ljósi kórónuveirufaraldursins. Enn liggur ekki fyrir endanlegt samkomulag milli flokka á Alþingi um frestun þingfunda fyrir sumarfrí og hvaða mál stefnt verður á að klára. Á dagskrá þingfundar í dag eru meðal annars áframhaldandi umræður um samgönguáætlun til næstu fimm og fimmtán ára en þingmenn Miðflokksins hafa verið sakaðir um að halda uppi málþófi vegna andstöðu flokksins við borgarlínu.