Fram­lengja samning um lág­marks­flug til Boston

Samgöngu- og sveitarstjórnarráðuneytið hefur framlengt samning við Icelandair um lágmarksflug til Bandaríkjanna til og með 8. ágúst. Samningurinn kveður á um að flogið verði minnst tvisvar í viku til Boston á tímabilinu.

Í tilkynningu á vef ráðuneytisins segir að samningur hafi verið gerður við flugfélagið í maí síðastliðinn um að tryggja millilandaflug í sumar til þriggja áfangastaða, Boston, London og Stokkhólms til og með 27. júní.

„Í samningnum voru einnig ákvæði um að framlengja mætti í tvígang, fyrst til 8. ágúst og aftur til 19. september nk. Þetta ákvæði var nýtt gagnvart flugi til Bandaríkjanna en ekki er lengur þörf á að tryggja lágmarksflug til Evrópu þar sem flugsamgöngur hafa tekið við sér að nýju.

Markmiðið er sem fyrr að tryggja lágmarks flugsamgöngur til og frá landinu vegna þess ástands sem skapast hefur vegna Covid-19 faraldursins. Allar tekjur Icelandair af flugi til Boston munu lækka greiðslur vegna samningsins,“ segir í tilkynningunni.