Talinn hafa þrengt að hálsi eiginkonu sinnar sem lést

Karlmaður á sextugsaldri, sem hefur verið ákærður fyrir manndráp með því að hafa banað eiginkonu sinni á heimili þeirra í Sandgerði í lok mars, er talinn hafa þrengt svo að hálsi hennar að hún lést af völdum köfnunar. Þetta kemur fram í ákæru á hendur manninum.

Konan lést þann 28. mars en maðurinn var ekki handtekinn fyrr en fjórum dögum síðar. Í fyrstu var talið að ekkert óeðlilegt væri við andlát konunnar en við krufningu vaknaði sterkur grunur um að maðurinn hefði orðið henni að bana.

Málið var þingfest í sumar en tímasetning aðalmeðferðar liggur ekki fyrir. Jón Höskuldsson, settur dómari í málinu, var á dögunum skipaður dómari við Landsrétt svo annar dómari þarf að taka við málinu.