Tom Brady lét ekki meira en tuttugu ára aldursmun stoppa sig

Tom Brady átti stórleik í NFL-deildinni í gær í sögulegum leik út frá aldri leikstjórndana liðanna. Tvö lið eru búin að vinna fjóra fyrstu leiki sína.

Seattle Seahawks og Buffalo Bills hafa bæði unnið fjóra fyrstu leiki sína í NFL-deildinni en tvö önnur lið gætu komist í þann hóp í kvöld.

Hvað ungur nemur gamall temur átti vel við í gær. Hinn 43 ára gamli Tom Brady leiddi Tampa Bay Buccaneers liðið þá til endurkomusigurs á móti Los Angeles Chargers.

Leikstjórnandi mótherjanna í Chargers var hinn 22 ára gamli Justin Herbert en nýliðinn átti mjög flottan leik og Los Angeles Chargers liðið náði 24-7 forystu í leiknum. Tom Brady var stórkostlegur í endurkomu síns liðs og gaf alls fimm snertimarkssendingar í leiknum.

Þetta er mesti aldursmunur á leikstjórnendum liða í sögu NFL-deildarinnar. Tom Brady var nákvæmlega 43 ára og 62 daga en Justin Herbert 22 ára og 208 daga.

Það var mjög gaman í stúkunni hjá dóttur Tom Brady eins og sjá má hér fyrir neðan.

Nýliðinn Joe Burrow hjá Cincinnati Bengals fagnaði á sama tíma sínum fyrsta sigri þegar Bengals liðið vann 33-25 sigur á Jacksonville Jaguars. Burrow varð þar fyrsti nýliðinn í sögu NFL til að kasta yfir 300 jarda þrjá leiki í röð.

Russell Wilson og félagar í Seattle Seahawks urðu fyrstir til að vinna fjóra leiki þegar þeir lögðu Miami Dolphins 31-23. Buffalo Bills bættist í hópinn seinna um daginn með 30-23 sigri á Las Vegas Raiders. Kansas City Chiefs og Green Bay Packers spila bæði í kvöld en þau hafa unnið þrjá fyrstu leiki sína.

Indianapolis Colts varð fyrsta liðið til að vinna Chicago Bears en Colts vörnin var sterk í 19-11 sigri. Bæði lið hafa nú unnið þrjá leiki og tapað einum.

Odell Beckham Jr. fór loksins í gang hjá Cleveland Browns liðinu og skoraði þrjú snertimörk í 49-38 sigri á Dallas Cowboys en Cleveland hefur nú unnið þrjá af fyrstu fjórum leikjum sínum. Dallas tapaði aftur á móti sínum þriðja leik á tímabilinu.

Lamar Jackson gaf tvær snertimarkssendingar og hljóp síðan sjálfur 50 jarda í mark þegar Baltimore Ravens vann 31-17 sigur á Washington Football Team og er eftir það með þrjá sigra og eitt tap.

Minnesota Vikings vann 31-23 sigur á Houston Texans í uppgjöri tveggja liða án sigurs og útherjinn Tre'Quan Smith og hlauparinn Latavius Murray skoruðu báðir tvö snertimörk þegar New Orleans Saints vann 35-29 sigur á Detroit Lions.

Philadelphia Eagles kom mörgum á óvart með því að vinna 25-20 útisigur á San Francisco 49ers liðinu en þetta var fyrsti sigurinn hjá Eagles á leiktíðinni. Tveir leikmenn liðsins, þeir Travis Fulgham og Alex Singleton, skoruðu fyrstu snertimörk sín á ferlinum í leiknum.