Vörubíll valt milli Hveragerðis og Selfoss

Lokað hefur verið fyrir umferð um Suðurlandsveg í austurátt við Kotströnd eftir að vörubíll valt á þriðja tímanum. Ökumaður var fluttur á Heilbrigðisstofnun Suðurlands til aðhlynningar en meiðsli hans eru talin minniháttar.

Haukur Grönli, varaslökkvliðsstjóri Brunavarna Árnessýslu, segir í samtali við Vísi að bílveltan hafi orðið við nýja vegkaflann á milli Hveragerðis og Selfoss, við Kotströnd.

Umferð sé lokað í austurátt en beint um Hvammsveg. Vörubíllinn var að flytja bik sem mun taka einhvern tíma að hreinsa.

Vörubíll fór einnig á hliðina eftir hádegið í gær í umdæmi Brunavarna Árnessýlu á aðrein frá Þrengslavegi til Reykjavíkur.