Tom Brady setti met í Las Vegas en gamla Patriots liðið hans fékk stóran skell

Sjöunda umferð NFL-deildarinnar fór fram um helgina og eftir hana er Pittsburgh Steelers eina liðið sem hefur ekki tapað leik í deildinni.

Tom Brady átti flottan leik með Tampa Bay Buccaneers þegar liðið vann sannfærandi 45-20 sigur á Las Vegas Raiders á nýja og glæsilega leikvanginum í Las Vegas. Tom Brady er orðinn 43 ára gamall en felur aldurinn vel.

Brady átti fjórar snertimarkssendingar í leiknum og er nú orðinn sá sem hefur gefið flestar snertimarkssendingar í sögu NFL. Brady komst upp fyrir Drew Brees í þessum leik.

Brady skoraði líka eitt snertimark sjálfur og síðasta snertimarkssendingin hans í leiknum var númer 559 á ferlinum í NFL-deildinni.

Það fór hins vegar illa fyrir hans gömlu félögum í New England Patriots sem töpuðu 6-33 á heimavelli á móti San Francisco 49ers. Þetta 27 stiga tap var stærsta tap liðsins siðan árið 2014.

Sparkarinn Zane Gonzalez tryggði Arizona Cardinals 37-34 sigur á Seattle Seahawks með vallarmarki þegar 15 sekúndur voru eftir af framlengingu. Þetta var fyrsta tap Seahawks liðsins á tímabilinu.

Ben Roethlisberger leiddi Pittsburgh Steelers til 27-24 útisigurs á Tennessee Titans en það munaði þó litlu að Steelers missti frá sér unnin leik eftir að hafa komist mest tuttugu stigum yfir. Sparkarinn Stephen Gostkowski gat tryggt Tennessee Titans framlangingu en vallarmark hans nítján sekúndum fyrir leikslok geigaði.

Pittsburgh Steelers hefur unnið sex fyrstu leiki tímabilsins en bæði liðin höfðu unnið fimm fyrstu leiki sína.

Meistarar Kansas City Chiefs vann 43-16 sigur á Denver Broncos í snjókomu í Denver þar sem öll liðin hjá Chiefs skoruðu. Patrick Mahomes kastaði fyrir einu snertimarki, hlauparinn Clyde Edwards-Helaire skoraði eitt, varnarmaðurinn Daniel Sorensen komst inn í sendingu og skoraði og að lokum þá skoraði Byron Pringle eftir að hafa tekið við boltanum þegar Denver liðið sparkaði honum frá sér.

Vandræði Dallas Cowboys héldu áfram en liðið tapaði 25-3 á móti Washington Football Team, liði sem jafði aðeins unnið 1 af fyrstu 6 leikjum sínum. Dallas er þegar búinn að missa aðalleikstjórnanda sinn í alvarleg meiðsli og varamaður hans, Andy Dalton, meiddist í þessum leik.