Ísland komið á HM 2021

Íslenska karlalandsliðið í handbolta er komið á heimsmeistaramótið í Egyptalandi 2021.

Evrópska handknattleikssambandið hefur ákveðið að umspilsleikir fyrir HM 2021 fari ekki fram. Þar átti Ísland að mæta Sviss.

EHF hefur ákveðið að niðurröðun liða á EM 2020 ráði hvaða landslið fari á HM í Egyptalandi. Þar endaði Ísland í 11. sæti og er því komið með farseðil á HM 2021.

Auk Íslands fengu eftirtalin lið frá Evrópu sæti á HM 2021 í dag: Slóvenía, Þýskaland, Portúgal, Svíþjóð, Austurríki, Ungverjaland, Hvíta-Rússland, Tékkland og Frakkland. Danmörk, Spánn, Króatía og Noregur voru þegar búin að tryggja sér HM-sæti.

Þetta er í 21. sinn sem Ísland kemst á HM. Á síðasta heimsmeistaramóti, í Danmörku og Þýskalandi í fyrra, endaði Ísland í 11. sæti.

HM 2021 verður fyrsta heimsmeistaramótið með 32 þátttökuliðum. Mótið hefst 14. janúar og lýkur 31. janúar.

Liðin sem eru komin á HM 2021