Sá besti á móti bestu vörninni og einvígi ungu og hlaupaglöðu leikstjórnendanna

Úrslitakeppni NFL-deildarinnar hófst um síðustu helgi en nú er komið af helginni sem er oft kölluð sú besta í boltanum. Þá fara fram undanúrslitin í bæði Þjóðardeildinni og Ameríkudeildinni.

Fyrri leikur dagsins er leikur Green Bay Packers og Los Angeles Rams en Packers liðið var með besta árangurinn í Þjóðardeildinni og sat hjá um síðustu helgi. Á sama tíma vann Rams-liðið glæsilegan sigur í Seatttle en liðsmenn Los Angeles Rams hafa verið frekar óútreiknanlegir síðustu vikur.

Seinni leikur kvöldsins er uppgjör á milli tveggja af framtíðarstjörnum deildarinnar en stuðningsmenn bæði Baltimore Ravens og Buffalo Bills hafa líka beðið lengi eftir því að lið þeirra gera einhverja hluti í úrslitakeppninni.

Green Bay Packers vann sex síðustu leiki sína fyrir úrslitakeppni og þrettán af sextán leikjum deildarkeppninnar. Leikstjórnandinn Aaron Rodgers og útherjinn Davante Adams hafa spilað frábærlega í allan vetur og Rodgers er mjög líklegur til að verða kosinn mikilvægasti leikmaður tímabilsins.

Það hefur verið mun meira vesen á liði Los Angeles Rams og þá ekki síst leikstjórnendastöðunni. Rams-vörnin er aftur á móti ein sú allra besta í deildinni og á henni fór liðið í gegnum Seattle Seahawks um síðustu helgi og þessi vörn gæti skapað vandræði fyrir sókn Packers mann í kvöld.

Baltimore Ravens og Buffalo Bills fögnuðu bæði sannfærandi sigrum um síðustu helgu. Baltimore Ravens hefur verið með frábært lið síðustu ár en tókst loksins að vinna leik í úrslitakeppni og sigur Buffalo Bills var fyrsti sigur liðsins í úrslitakeppni í 25 ár.

Leikstjórnendur Baltimore Ravens og Buffalo Bills eiga það sameiginlegt að vera ungir leikmenn sem hafa þegar komið sér í hóp þeirra bestu í deildinni. Þeir eru líka mjög duglegir við að hlaupa sjálfir með boltann upp völlinn; stórir, hraustir og hugrakkir strákar.

Lamar Jackson hjá Baltimore Ravens var valinn mikilvægasti leikmaður deildarinnar í fyrra en þá klúðraði Ravens liðið fyrsta leik í úrslitakeppninni. Nú eru menn staðráðnir að bæta fyrir það þrátt fyrir ekki alveg eins glæsilega deildarkeppni. Liðið kom samt inn í úrslitakeppninni á góðri siglingu.

Josh Allen hjá Buffalo Bills hefur aftur á móti átt frábært tímabil og er einn af þeim sem koma til greina sem mikilvægasti leikmaður deildarinnar. Bills liðið vann 27-24 sigur á Indianapolis Colts um síðustu helgi sem var fyrsti sigur liðsins í úrslitakeppninni síðan 1995. Allen hefur bætt sendingarnar mikið frá því í fyrra og er orðin einn sá besti í deildinni.

Útsending frá leik Green Bay Packers og Los Angeles Rams hefst klukkan 21.25 á Stöð 2 Sport 2 en klukkan 01.00 hefst síðan útsending frá leik Buffalo Bills og Baltimore Ravens á sömu stöð.

NFL er á Stöð 2 Sport en upplýsingar um útsendingar má finna hér. NFL er hluti af Stöð 2 Sport erlent sem kostar 3.990 krónur á mánuði. Beinar útsendingar frá öllum leikjum eru á NFL Game Pass sem hægt er að kaupa sem viðbót við Sportpakkann á 2.000 krónur á mánuði.