Þurfa ekki að skrá sig atvinnulausa á Íslandi mánaðarlega

Kári Stefánsson forstjóri íslenskrar erfðagreiningar segir breska afbrigði covid 19 veirunnar sleppa hingað til lands í gegnum landamæri víða að.

„Frá austur Evrópu, Bretlandi, Bandaríkjunum og Skandinavíu. Þetta kemur víða að,“ segir Kári. Hann vilji afnema þá reglu að útlendingar á atvinnuleysisbótum þurfi að staðfesta hér á landi að þeir séu í atvinnuleit til að halda bótum.

Mikill fjöldi Pólverja býr á Íslandi en í heimalandi þeirra er covid ástandið mjög alvarlegt. Þar var slegið met í fyrradag þegar þrjátíu þúsund greindust með veiruna og sex hundruð létust.

„Það eina sem við þurfum að gera er að taka af þeim skylduna til að koma hingað. Hún er íþyngjandi ekki bara fyrir þá heldur er hún hættuleg fyrir íslenskt samfélag,“ segir Kári.

Unnur Sverrisdóttir forstjóri Vinnumálastofnunar segir það ekki bara skyldu heldur rétt útlendinga sem hafa verið á fullum atvinnuleysisbótum í einn mánuð að dvelja í allt að þrjá mánuði í heimalandinu eða öðru EES ríki og leita sér þar að vinnu án þess að þurfa að skrá sig mánaðrlega á Íslandi. Þeir fái þá svo kallað U-2 vottorð.

„Þetta eru evrópureglur, evrópu tilskipun.“

Væri hægt að hafa þetta tímabil lengra í ljósi þess hvað þessi pest er búin að ganga lengi yfir?

„Þá þarf lagabreytingu til. En samkvæmt evróputilskipuninni má hafa þetta upp í allt að sex mánuði. Þetta tímabil sem þú ert í atvinnuleit annars staðar,“ segir Unnur.

Frá áramótum hafi rúmlega sex hundruð erlendir atvinnuleitendur fengið U-2 vottorð . Flestir þeirra séu Pólverjar enda fjölmennastir útlendinga hér á landi. Atvinnuleitendur séu hins vegar ekki meirihluti þeirra tæplega sex þúsund ferðamanna sem komi til landsins í hverjum mánuði.

„En á grundvelli U-vottorða til dæmis núna í mars, það er kannski hluti þeirra sem fóru út í desember og janúar, eru þetta kannski tvö hundruð og fimmtíu manns. Þetta eru fjögur prósent. Þannig að ég er ekki að sjá að það séu endilega atvinnuleitendur sem eru endilega að bera smitið til landsins. Veiran kemur inn í landið með ferðamönnum. Á meðan við lokum ekki alveg landinu þá er þessi hætta bara fyrir hendi,“ segir Unnur.

Kári vill fjölga sóttkvíardögunum milli sýnataka hjá þeim sem koma til landsins.

„Vegna þess að við vitum nokkur dæmi þess að menn hafa komið til landsins og verið neikvæðir á landamærum. Verið neikvæðir eftir fimm daga og orðið síðan jákvæðir síðar. Þannig að ég held að ein af einföldu aðferðunum sé að lengja sóttkvíartímann um tvo til þrjá daga,“ segir Kári Stefánsson.