Innlent

Yfirlýsing um Sundabraut: „Má segja að framkvæmdin sé hafin þótt engin sjáist grafan“

Kristján Már Unnarsson skrifar
Borgarstjóri og samgönguráðherra takast í hendur eftir undirritun yfirlýsingar um Sundabraut í dag.
Borgarstjóri og samgönguráðherra takast í hendur eftir undirritun yfirlýsingar um Sundabraut í dag. KMU

Framkvæmdir við Sundabraut eiga að hefjast eftir fimm ár og brautin að vera tilbúin eftir tíu ár, samkvæmt yfirlýsingu sem samgönguráðherra og borgarstjóri undirrituðu á Vogabakka í Sundahöfn síðdegis. Leggja á brautina alla leið í einni samfelldri framkvæmd og efna til alþjóðlegrar hönnunarsamkeppni um útlit Sundabrúar, verði hún fyrir valinu.

Sigurður Ingi Jóhannsson samgönguráðherra segir að núna geti menn farið að bretta upp ermar. Í fréttum Stöðvar 2 sagði hann að nú þegar hefðu farið allnokkrar vinnustundir í verkefnið en þær yrðu mjög margar héðan í frá.

Yfirlýsingin undirrituð á Vogabakka.KMU

„Þannig að það má segja að framkvæmdin sé hafin þótt engin sjáist grafan,“ sagði ráðherrann og kvaðst fagna þessum degi gríðarlega. Sundabrautin myndi bæta umferðaflæði á öllu höfuðborgarsvæðinu og bæta tengingar landsbyggðarinnar inn í borgina.

„Ég held að þetta bara rammi bara mjög vel inn þessi næstu skref í málinu þó að það séu mörg handtök eftir,“ sagði Dagur B. Eggertsson borgarstjóri um yfirlýsinguna.

Sundabraut verður öll lögð í einni samfelldri framkvæmd en ekki skipt upp í áfanga, samkvæmt yfirlýsingunni.

Sem fyrr er gert ráð fyrir að Sundbrautin verði í einkaframkvæmd og alfarið kostuð með veggjöldum. En má búast við að það geti orðið núningar milli ríkis og borgar í þessu máli, eins og hafa verið?

„Þeir hafa auðvitað verið í mjög langan tíma. Þessvegna er þessi viljayfirlýsing okkar í dag til marks um það að við höfum náð sameiginlegri sýn um verkefnið. Þessvegna er þetta stór dagur,“ svarar samgönguráðherra.

„Nú erum við að fara í leiðarvalið. Og þar eru einkum tveir kostir: Annarsvegar Sundabrú eða Sundagöng. Þetta verður metið núna í kjölfar félagshagfræðilegrar greiningar sem er að ljúka núna,“ segir borgarstjóri.

Áætlað er að Sundabraut kosti um sjötíu milljarða króna, verði Sundabrú valin, en fjórtán milljörðum meira, verði Sundagöng valin.KMU

Samkvæmt yfirlýsingunni er stefnt að því að framkvæmdir við Sundabraut hefjist árið 2026 og að brautin verði tekin í notkun árið 2031. En trúa menn því að þær tímasetningar standist?

„Já, ég er bjartsýnn. Mér finnst þetta verkefni, frá því við tókum það föstum tökum núna á þessu kjörtímabili, hafa verið í fínum farvegi og eiginlega allir áfangar gengið upp. Og ég held að það haldi áfram,“ svarar ráðherrann.

„Nú held ég að við séum kannski í fyrsta skipti komin með raunhæfa tímaáætlun. En auðvitað þarf að hafa í öllum svona stórum og flóknum verkefnum fyrirvara varðandi umhverfismat og skipulagsþáttinn og það samráð sem framundan er,“ svarar borgarstjórinn.

Hér má sjá frétt Stöðvar 2:

Sundabraut Vegagerð Vegtollar Umferðaröryggi Reykjavík Mosfellsbær Samgöngur Skipulag

Tengdar fréttir

Samgönguráðherra segir hugsanlegt að flýta hluta Sundabrautar

Samgönguráðherra segir hugsanlega hægt yrði að flýta framkvæmdum við lagningu Sundabrautar með því að byrja á kaflanum milli Gufuness og Kjalarness á með umhverfismat og aðrar rannsóknir fari fram á kostum brúar eða neðansjávarganga milli sundahverfis og Gufuness. Hann sé sannfærður um að brúin muni reynast betri kostur eftir því sem málið verði skoðað betur.

Vonast eftir aðkomu lífeyrissjóða að Sundabraut

Sigurður Ingi Jóhannsson, samgöngu- og sveitarstjórnarráðherra, mun kynna skýrslu um gerð Sundabrautar og hvernig hægt verði að fara í þær framkvæmdir. Þetta sagði Sigurður í Sprengisandi á Bylgjunni í dag þegar hann var spurður um mögulega aðkomu lífeyrissjóða að stórum samgönguframkvæmdum hér á landi.

Nefndi Sundabraut „bara sem eitt dæmi“

Ásgeir Jónsson, seðlabankastjóri, segir að ummæli sín um að ámælisvært væri að Sundabraut hafi ekki verið byggð hafi aðeins verið dæmi til að undirstrika hversu gott tækifæri væri fyrir ríkissjóð um þessar mundir að fjárfesta í innviðum á borð við samgöngumannvirkjum.

Lýsir yfir vantrausti á Sigurð Inga og Dag vegna Sundabrautar

Vigdís Hauksdóttir, borgarfulltrúi Miðflokksins í borgarstjórn Reykjavíkurborgar lýsti yfir vantrausti á ráðherra Samgöngumála, Sigurð Inga Jóhannsson, og borgarstjóra Dag B. Eggertsson í viðtali í útvarpsþættinum Reykjavík síðdegis á Bylgjunni í dag.

Mest lesið


Fleiri fréttir

Sjá meira


×

Mest lesið