Ólympíufari Norðmanna upplifði einelti og áreiti í skóla af því að hún æfði „asnalega“ íþrótt

Tuxen elskaði dýfingar frá fyrsta degi og fór svo sannarlega á móti straumnum þegar hún valdi sér þessa íþrótt. Það þótti ekki vinsælt val hjá henni og fyrir vikið mátti hún þola einelti í skóla vegna íþróttarinnar sem þótti asnaleg.

Tuxen ræddi þetta allt saman í viðtali við norska ríkisútvarpið og þar kom í ljós að fjölskylda hennar, sem kallar sig „Team Tuxen“ hefur heldur betur staðið við bakið á henni á langri leið hennar á Ólympíuleika. Faðir hennar þjálfar hana og yngri systir hennar æfir einnig íþróttina.

„Ég lifi fyrir þetta og ég svo stolt af sjálfri mér. Þetta algjörlega fjarstæðukennt,“ sagði Anne Vilde Tuxen um að vera að keppa á Ólympíuleikunum í dýfingum.

Tíu ára gömul var hún farin að vakna klukkan sex á morgnanna til að ná lyftingaæfingu áður en hún færi í skólann. Nokkra tíma æfing og svo önnur æfing eftir skóla. „Svona gekk þetta í mörg ár,“ sagði Anne.

Ekki tími fyrir neitt annað

Þetta þýddi um leið að hún hafði ekki tíma fyrir neitt annað en skólann og æfingarnar. Það var mikill tími með „Team Tuxen" en enginn tími fyrir vini og skólafélaga.

„Krakkarnir voru ekki hrifnir af því sem ég var að gera. Það voru mörg ljót orð sögð og ég var skilinn út undan. Ég komst ekki inn í hópinn,“ sagði Anne.

„Þú ert mikið ein og fyrir utan allt. Ég hef svo oft komið heima úr skólanum og grátið. Þú ert einn af því að það þarf svo sérstakt framlag til að reyna að vera best,“ sagði Anne.

Það var stór stund fyrir hana að tryggja sér sæti á Ólympíuleikunum og hún sendi frá sér skilaboð á Instagram.

„Ég gafst aldrei upp þegar aðrir efuðust um mig og vildu bara ná höggi á mig. Mér hefur verið strítt hvernig ég lít út og fólk hefur efast um mig alla mína æfi, bæði vegna þeirra ákvarðana sem ég hef tekið og þeirrar persónu sem ég vildi verða. Ég hef samt verið heppin að hafa svo frábært lið í kringum mig og ég hefði ekki getað þetta án ykkar. Við erum lið, við erum Team Tuxen,“ skrifaði hún.

Gefa skít í allt saman og fara í partý

En hefur hún verið við það að gefast upp.

„Já. Gefa skít í allt saman og fara í partý. Drekka eins mikið og þau vilja og hætta í dýfingunum. Ég vildi stundum ekki standa alein og þetta var erfitt,“ sagði Anne.

Hún hefur fengið mikinn stuðning frá systur sinni Helle Tuxen sem er líka að æfa dýfingar.

„Þegar ég var ellefu ára þá fékk ég kort frá Vilde. Hún hafði teiknað mynd af mér að dýfa mér á Ólympíuleikunum 2020. Það hefur síðan verið markmið og draumur okkar beggja,“ sagði Helle sem er litla systir Anne.

Ekki svalt að vera í dýfingum

Helle hefur staðið með Anne í öllu mótlætinu.

„Það var ekki svalt að vera í dýfingum. Ekki í barnaskóla, gagnfræðaskóla eða menntaskóla. Að eiga stóra systur sem fer á fætur með þér og er til staðar. Það hefur skipt mig miklu máli því fólk getur verið svo vitlaust,“ sagði Helle sem ætlaði sér líka á leikana en aðeins Anne komst þangað.

Það má lesa allt viðtalið með því að smella hér.