Reynslumestu leikmenn íslenska karlalandsliðsins eru sagðir hóta því að hætta að spila með íslenska landsliðinu ef stjórn Knattspyrnusambands Íslands heldur áfram afskiptum sínum af vali liðsins.
Morgunblaðið slær þessu upp í morgun en blaðamaðurinn Bjarni Helgason hefur heimildir fyrir þessum afarkostum sem sumir landsliðsmenn hafa sett fyrir næstu verkefni liðsins.
Kolbeinn Sigþórsson var valinn í síðasta verkefni landsliðsins en stjórn KSÍ lét taka hann út úr hópnum eftir mikla umfjöllun um meint ofbeldisverk hans frá árinu 2017 gegn tveimur stúlkum á skemmtistað í miðborg Reykjavíkur.
Það var mikil óánægja innan íslenska landsliðshópsins með þetta útspil stjórnar KSÍ en stjórnin sagði síðan öll af sér og fram undan er aukaþing hjá KSÍ þar sem þarf að setja saman nýja bráðabirgðastjórn.
Næsta verkefni íslenska karlalandsliðsins eru tveir heimaleikir í október á móti Armeníu og Liechtenstein.
Í grein Morgunblaðsins kemur einnig fram að Arnar Þór Viðarsson, þjálfari íslenska karlalandsliðsins, hafi hug á því að velja að minnsta kosti annan þeirra, sem hafa verið sakaðir á samfélagsmiðlum um nauðgun árið 2010, í hópinn sinn fyrir leikina gegn Armeníu og Liechtenstein.
Leikmennirnir sem um ræðir hafa ekki verið nafngreindir. Það verður kosin ný stjórn hjá KSÍ skömmu eftir að Arnar Þór mun tilkynna hópinn fyrir næstu leiki. Það má finna alla greinina í Morgunblaðinu hér.
