Svarar gagnrýni Lars: „Á meðan hjálpa ég gömlum þjálfara að selja bækur“

Í bókinni People and Football eftir Per Joar Hansen tjáir Lars sig um síðustu daga sína sem þjálfari norska landsliðsins. Þar fer hann meðal annars yfir deilurnar við Sørloth eftir að Noregur tapaði fyrir Serbíu í umspili um sæti á EM.

„Síðan ég byrjaði að þjálfa fótbolta árið 1977 og svo landslið frá 1990 þá hef ég aldrei upplifað aðra eins framkomu frá leikmann. Það er enginn einu sinni nálægt honum,“ sagði Lars um Sørloth.

Framherjinn er ekki í norska landsliðshópnum sem mætir Tyrklandi og Svartfjallalandi í undankeppni HM 2022 vegna meiðsla. Í færslu á Instagram óskaði hann samherjum sínum góðs gengis í leikjunum sem framundan eru og skaut í leiðinni á Lars.

„Gangi ykkur vel á föstudaginn strákar. Ég er byrjaður í léttum æfingum og vonast til að vera tilbúinn fyrir landsleikina í nóvember. Á meðan hjálpa ég gömlum þjálfara að selja bækur,“ skrifaði Sørloth sem er á láni hjá Real Sociedad frá RB Leipzig.

Lars var látinn fara sem þjálfari norska landsliðsins á síðasta ári. Við starfi hans tók Ståle Solbakken. Lars er nú í þjálfarateymi sænska úrvalsdeildarliðsins Östersund. Þar starfar hann við hlið Pers Joars Hansen sem var aðstoðarmaður hans hjá norska landsliðinu.