Ragnhildur Alda boðar oddvitaslag hjá Sjálfstæðisflokknum í borginni

„Þetta var búið að blunda í mér síðastliðinn mánuð og það er bara þannig að við sjálfstæðismenn elskum valfrelsið og tölum um hvað okkur þykir vænt um það. Mér fannst vanta að virða það og tel mig góðan valkost,“ segir Ragnhildur í samtali við fréttastofu.

Morgunblaðið greindi fyrst frá framboði Ragnhildar en í viðtali sem birtist í blaðinu í morgun segist Ragnhildur leggja mikla áherslu á húsnæðis- og samgöngumál, leikskóla- og grunnskólamál og þjónustu við íbúa almennt. 

Ragnhildur Alda fer upp á móti Hildi Björnsdóttur, borgarfulltrúa, í oddvitaslaginum eins og áður segir en Hildur var í öðru sæti á lista Sjálfstæðisflokksins í síðustu kosningum. Ragnhildur segist ekki kvíðin fyrir því að fara upp á móti manneskju sem hefur verið í forystu flokksins í borginni undanfarið kjörtímabil. 

Vill forræðishyggjuna burt

Ragnhildur Alda greinir frá þessu í viðtali við Morgunblaðið sem birtist í morgun. Hún segist leggja áherslu á húsnæðis- og samgöngumál, leikskóla- og grunnskólamál og þjónustu við íbúa almennt. 

„Ég er bara búin að vera það lengi í innra starfi flokksins og vera mjög virk þar. Þegar maður hefur stýrt og starfað í nokkrum kosningum þá sér maður bara að þetta er röð verkefna sem þarf að klára. Ég hef marga hildi háð þannig að hún er mjög flottur keppinautur í þetta og þykir heiður að fá að setja hattinn minn í hringinn,“ segir Ragnhildur.

Stefnumótun núverandi meirihluti í þeim málum, að hennar mati, hafi einkennst af forræðishyggju. Sem sé að hennar mati leið til að halda úti lélegri þjónustu.

„Ég vil sjá borgina fara úr því að vera með forræðishyggju að baki sinni stefnumótun í að láta stefnumótun snúast um þarfir íbúanna. Við þurfum að byggja 27 þúsund íbúðir á næstu átta árum samkvæmt nýjustu mannfjöldaspá Húsnæðis- og mannvirkjastofnunar og þá þýðir það að það að einblína bara á þéttingarreiti er aldrei að fara að duga,“ segir Ragnhildur og segist vilja sjá að byggt verði á nýju landi og borgin breikkuð út. 

„Við þurfum þar af leiðandi að leggja áherslu á að greiða fyrir umferð og ferðalaga allra óháð ferðamáta og við verðum upp úr því að byggja upp innviðina alls staðar, eins og leikskóla og skóla því þetta vinnur saman. Ef það eru ekki nógu góðir innviðir þá eykur það á umferðina.“

Borgarlínan gangi ekki upp sé Strætó farlama

Þá segir hún að hafa þurfi meira samráð við rekstraraðila í miðborginni um skipulag þar. 

„Það sem borgarstjórnarmeirihlutinn hefur verið að tala fyrir núna er fækkun bílastæða og fleira en þetta er bara ekki að fara að ganga upp. Mér finnst að það ætti að vera miklu betra samráð við rekstraraðila. Þurfa götur niðri í miðbæ að vera göngugötur? Gæti verið að vistgötur séu betri lausn?“ spyr Ragnhildur. 

Sömuleiðis segir hún að endurhugsa þurfi áætlanir um Borgarlínu. 

„Eins og staðan er núna hefur Strætó sligast undan rekstrarkostnaðinum sem hefur fylgt honum og það hefur valdið því að Strætó hefur þurft að minnka þjónustu við íbúa, fækka stoppum og hætta með næturstrætó. Við erum núna að tala um að fara í samgöngubreytingar, Borgarlínuna, sem mun vera mjög kostnaðarsöm eins og hún lítur út núna og Borgarlínan á að fara í gegn um borgina eins og snákur og Strætó að fæða hana úr efri byggðum og hverfunum. Þetta mun ekki ganga upp ef Strætó er farlama. Við þurfum að huga að því að við sitjum ekki uppi með samgöngukerfi sem kostar skattgreiðendur gífurlegt fjármagn en virkar svo ekki sem skyldi.“

Uppfært klukkan 13:10 eftir að tal náðist af Ragnhildi.