Eldur kviknaði í stærsta kjarnorkuveri Evrópu í kjölfar árása Rússa

Zaporizhzhia-kjarnorkuverið er það stærsta í Evrópu og fréttir af árásunum og eldinum vöktu mikil og hörð viðbrögð víða. Alþjóðakjarnorkumálastofnunin (IAEA) sagðist meðal annars hafa virkjað viðbragðsáætlun en framkvæmdastjóri stofnunarinnar sagðist hafa verulegar áhyggjur af ástandinu.

Ef marka má fyrstu fréttir var aldrei alvarleg hætta á ferðum vegna eldsins, enda sex kjarnakljúfar versins vel varðir. Hins vegar kölluðu ráðamenn víðsvegar um heim eftir því að bardögum yrði hætt í kringum kjarorkuverið.

Sérfræðingar hafa varað við því að árásir séu ólíklegar til að valda skaða á kjarnakljúfunum sjálfum en mikil og veruleg hætta gæti skapast ef eitthvað henti þann búnað sem sér kælikerfum kjarnorkuversins fyrir orku.

Zaporizhzhia-verið og nágrannabærinn Energodar hafa verið umkringd af rússneskum hersveitum frá því í byrjun vikunnar. Þegar eldurinn braust út bárust fréttir af því að sveitirnar hefðu reynt að hamla slökkvistarfinu.