Viðskipti innlent

Segir Bolungarvíkurgöng hafa bjargað Bjarnabúð

Kristján Már Unnarsson skrifar
Stefanía Birgisdóttir, kaupmaður í Bjarnabúð í Bolungarvík.
Stefanía Birgisdóttir, kaupmaður í Bjarnabúð í Bolungarvík. Arnar Halldórsson

Margir spáðu því að Bjarnabúð í Bolungarvík, ein elsta verslun landsins, myndi lognast út af með Bolungarvíkurgöngum þegar auðveldara varð fyrir Bolvíkinga að skreppa í búðir á Ísafirði. Reynsla kaupmannsins varð þveröfug; Ísfirðingar fóru að versla í Bolungarvík.

Reynsla smærri byggða af jarðgöngum hefur verið sú að með þeim hefur ýmis þjónusta eins og verslun flust til stærri byggða. Bjarnabúð lifir hins vegar góðu lífi en hún var heimsótt í fréttum Stöðvar 2.

„Það bara reddaði versluninni. Af því að Bolvíkingar notuðu alltaf Óshlíðina, fóru alltaf, alveg sama hvernig veðrið var, fóru inn eftir á Ísafjörð, eða bara hvert sem þeir þurftu. En það kom enginn til okkar,“ segir kaupmaðurinn Stefanía Birgisdóttir.

Viðskiptavinum býðst að tylla sér á stól við afgreiðsluborðið.Arnar Halldórsson

„Svo koma göngin og þá bara breyttist allt hérna í Bolungarvík. Þá fór fólk að koma hingað til Bolungarvíkur. Koma í verslunina, koma í þjónustufyrirtæki, sundlaugina, nota félagsheimilið. Það breyttist allt.“

-Og hvað er það sem Ísfirðingar fá hér sem þeir geta ekki fengið á Ísafirði?

„Það er bara svo margt. Öðruvísi vöruval, öðruvísi vöruúrval. Svo finnst bara fólki gott að koma til mín og versla við mig,“ svarar Stefanía.

Vöruúrvalið finnst okkur furðumikið, búðin minnir á gamla kaupfélagið. Þetta er matvörubúð, sjoppa, ritfangaverslun..

„..fatnaður, gjafavara, leikföng, garn. Bara nefndu það.“

Verzlun Bjarna Eiríkssonar hefur verið starfrækt óslitið frá árinu 1919.Arnar Halldórsson

Hún heitir Verzlun Bjarna Eiríkssonar og á sér yfir eitthundrað ára sögu. Á efri hæðinni er vísir að verslunarsafni.

„Þetta er öðruvísi upplifun. Þetta er líka upplifun að koma í búðina mína,“ segir Stefanía Birgisdóttir, kaupmaður í Bjarnabúð.

Meira er sagt frá búðinni í þættinum Um land allt, þeim seinni af tveimur um mannlíf í Bolungarvík, en þættina má nálgast á Stöð 2+.

Hér má sjá fréttina:

Um land allt Bolungarvík Ísafjarðarbær Verslun Vegagerð Samgöngur

Tengdar fréttir

Bolvíkingurinn Jakob Valgeir vill sameiningu við Ísafjörð

„Ég skil svo sem ekki af hverju menn sameinast ekki Ísafirði. Styrkja byggðarlögin. Vera bara með eitt sveitarfélag á norðanverðum Vestfjörðum,“ segir útgerðarmaðurinn og Bolvíkingurinn Jakob Valgeir Flosason, framkvæmdastjóri Jakobs Valgeirs ehf., stærsta fyrirtækis Bolungarvíkur.

Hjúkrunarfræðingurinn sem elskar að vera sauðfjárbóndi

„Ég er sem sagt hjúkrunarfræðingur og vinn hérna á Bergi, hjúkrunarheimilinu. En svo er ég með 130 ær en er í samkrulli með tengdapabba, sem er með 250," segir Svala Björk Einarsdóttir, sem er í hópi fjölmargra sauðfjárbænda í Bolungarvík.

Mjólkurvinnslan Arna sýnir að ekki þarf allt að vera í Reykjavík

Mjólkurvinnslan Arna hefur á einum áratug vaxið upp í það að verða næststærsta fyrirtæki Bolungarvíkur, með yfir fjörutíu manns í vinnu. Stofnandinn segir þetta sýna að það þurfi ekki allt að vera í Reykjavík, það sé vel hægt að byggja upp öflugt fyrirtæki úti á landi.

Illviðrin úr Jökulfjörðum brjóta fyrst á húsi Einars

„Þegar norðaustanáttin kemur hér úr Jökulfjörðunum þá er fyrsti fasti punkturinn sem hún brýtur á húsið mitt. Maður finnur stundum fyrir þessu en allt er þetta þess virði,“ segir Bolvíkingurinn Einar K. Guðfinnsson, fyrrverandi alþingismaður og ráðherra, sem býr í einu ysta húsinu við sjávarbakkann í Bolungarvík.



Mest lesið


Fleiri fréttir

Sjá meira


×

Mest lesið